Қобилҷон Алиев, навраси 10-солаи тоҷик, ки ду рӯз пеш дар Русия кушта шуд, дар деҳаи Аҷами ноҳияи Шаҳринав ба хок супориданд. Ӯ дар мактабе дар вилояти Маскав аз сӯйи навраси 15-сола ва шаҳрванди Русия бо корд ва бар пояи бадбинии миллӣ кушта шуд.

Қарор буд, Қобилҷон дирӯз бо пои худ ба ватан ояд, вале субҳи имрӯз ҷасади ӯро ба деҳа оварданд.

Бо вуҷуди сардии ҳаво ва боридани борон садҳо тан аз гӯшаву канори кишвар барои иштирок дар ҷанозаи ин кӯдаки ғурамарг омаданд. Ҷаноза зери тадбирҳои амниятӣ гузашт ва рӯзноманигоронро нагузоштанд, ки озод аксу навор гиранд.

Бештар дар навори мо бинед:

Модараш дар ҳоле, ки барои фарзанди кушташудааш талх мегирист, аз мардум хост ба хона дароянд, писарашро бинанд ва барояш дуо кунанд.

Дар ҷанозаи Қобилҷон Саидмукаррам Абдуқодирзода, муфтии кишвар низ ҳузур дошт ва дар суханронии худ ин кушторро “нангин ва даҳшатнок” хонд.

Баъди ба хок супоридани Қобилҷон ҳам мардум гурӯҳ-гурӯҳ барои ҳамдардӣ меомаданд. Вале баҳси куштори ин кӯдаки тоҷик дар ҷомеа ва шабакаҳои иҷтимоӣ рӯз аз рӯз бештар мешавад. Ҷомеа на танҳо муҷозоти қотили Қобилҷонро мехоҳад, балки ба ташхису маҳкум кардани омили аслии ин ҷинояти мудҳиш - миллатгароӣ ва муҳоҷирситезӣ дар Русия таъкид мекунад.

Шоми имрӯз, 18-уми декабр хабар расид, ки додгоҳ шаҳрванди 15-солаи Русияро, ки ба куштори Қобилҷон Алиев муттаҳам аст, 2 моҳ ба ҳабси пешакӣ гирифт.

Дар Telegram, Facebook ва Instagram бо мо бимонед.