Ҳоло дар зиндони занонаи шаҳри Норак 11 кӯдаки то сесола ҳамроҳи модарашон нигоҳдорӣ мешаванд. Ҳамчунин, дар байни 471 зан, ки дар ин маҳбас адои ҷазо мекунанд, ду зани ҳомила низ будаанд.

Ин иттилоъ рӯзи 9-уми феврал дар нишасти матбуотии Ваколатдори ҳуқуқи инсон дар Тоҷикистон ба рӯзноманигорон гуфта шуд.

Ҳусниддин Нидоев, роҳбари гурӯҳи мониторингии назди Ваколатдори ҳуқуқи инсон гуфт, рӯзи 13-уми декабри соли 2025 аз ин маҳбас боздид карда, бо шароити нигоҳдории занон, аз ҷумла бахше, ки кӯдакони ноболиғ нигоҳ дошта мешаванд, шинос шудааст.

Ба қавли ӯ, ҳар як кӯдак бо модараш дар ҷойи алоҳида ҷойгир буда, шароити муносиб барои кӯдакон муҳайё аст.

Ҳангоми суҳбат танҳо баъзе занон аз камбуди уребча дар фасли зимистон гуфтаанд ва ба қавли ӯ, аз ҷониби кормандони Ваколатдори ҳуқуқи инсон ва ҷомеаи шаҳрвандӣ ба онҳо дастрас карда шудааст.

“Занҳо гуфтанд, ки одатан ба онҳо ин чиз дастрас мешавад, вале бинобар ин ки зимистон асту ҳаво сардтар, бештар ниёз доранд”, - гуфт Нидоев.

Ин масъули Омбудсмен иддао мекунад, ки занҳо шикояти дигаре надоштанд ва барои кӯдакон шароити бозӣ низ муҳайё буда, хӯрока ва дигар мавод низ ба таври кофӣ дастрас аст.

Дар ҳамин ҳол, чанд рӯз пеш Бунафша Файзиддинзода, раиси Кумитаи кор бо занон ва оилаи Тоҷикистон гуфта буд, масъулини Кумита чанд моҳ пеш ба дидори занони маҳбус дар зиндони Норак рафтанд ва аз ҷониби занони маҳкумшуда баъзе муроҷиатҳо низ пешниҳод шудаанд. Вале ба таъкиди ӯ, “бархе аз масъалаҳои матраҳшуда аз сӯи занон ба салоҳияти Кумита дохил намешавад”.

Аммо ӯ мушаххас нагуфт, ки муроҷиати занон дар чӣ хусус буд.

Тасдиқи иддаои мақомоти расмӣ тавассути манобеи ғайрирасмӣ ва ё мустақим ғайриимкон аст, чун дар чанд вақти охир намояндагони расонаҳо аз ин зиндон дидан накардаанд.

Ҳоло дар маҳсаби Норак 471 зан адои ҷазо мекунанд. Соле қабл ин рақам ба 483 баробар буд. Гуфта мешавад, ки аксари парвандаҳои ҷиноӣ алайҳи занон ба ҷиноятҳои иқтисодӣ марбутанд. 

Дар Telegram, Facebook ва Instagram бо мо бимонед.