Барои рушди суботи иқлимӣ дар Тоҷикистон Бонки аврупоии таҷдиду рушд (БАТР) ба ташкилоти амонатии қарзии хурди «Ҳумо» 2 млн. доллари ИМА маблағ ҷудо кард.

Дар иттилоияи рӯзи чоршанбе интишоршудаи БАТР дар ин робита қайд мешавад, ки қарз бо арзи миллии Тоҷикистон - сомонӣ, баробар бо 2 млн. доллари ИМА дар шарикӣ бо Барномаи омзоишии суботи иқлимӣ (PPCR) пешниҳод мегардад.

«Ин қарзи дуюм дар доираи механизми иноватсионии маблағгузорӣ аст, ки аз 1 декабр, замони гирдиҳам омадани сарони кишварҳои ҷаҳон дар Париж дар Конфронс оид ба иқлим COP21 мавриди амал қарор гирифт ва нахустин механизми махсуси фаъолияти БАТР дар минтақа мебошад, ки ба лоиҳаҳои мусоидаткунанда ба мутобиқат ҷиҳати тағйирёбии иқлим нигаронида шудааст», - таъкид мешавад дар иттилоия.

Гуфта мешавад, якумин кишваре, ки тариқи ин механизми маблағгузорӣ воситаҳо дастрас мекунад, Тоҷикистон аст, ки яке аз кишварҳои дорои сатҳи баланди осебпазирӣ аз оқибатҳои тағйирёбии иқлим мебошад.