Нимсолаи аввали соли равон ҳаҷми муомилоти моли хориҷии Тоҷикистон беш аз 2 млрд. долларро ташкил дод, ки нисбат ба ҳамин давраи соли гузашта 20% ё худ 353 млн. доллар зиёдтар аст.

Давоми моҳҳои январ-июни соли 2018 ҳаҷми содирот аз ҷумҳурӣ 528,3 млн. долларро ташкил додааст, ки нисбат ба моҳҳои январ-июни соли гузашта 15,3% ё худ 70,2 млн. доллар бештар аст.

Тӯли 6 моҳи соли ҷорӣ воридот ба маблағи беш аз 1,5 млрд. доллар сурат гирифтааст, ки нисбат ба ҳамин давраи соли 2017 - 22,7% ё худ 283,1 млн. доллар зиёдтар мебошад, хабар доданд ба «Азия-Плюс» аз Агентии омори назди Президенти Тоҷикистон.

Ҳамин тариқ, тавозуни савдо манфӣ ташаккул ёфта, ҳаҷми воридот нисбат ба содирот беш аз 1 млрд. доллар зиёдтар мебошад.

Нишондиҳандаи рӯйпӯш кардани маблағи ҳаҷми воридот бо содирот - 35%-ро ташкил додааст. Дар ҳамин давраи соли гузашта ин нишондиҳанда ба 36% баробар буд, яъне таносуби содирот ба воридот 1% коҳиш ёфтааст.

Тоҷикистон асосан ашёи хом содирот намуда, маҳсулоти коркардшуда - қариб ҳамаи маҳсулоти зарурии тайёрро аз хориҷи кишвар ворид мекунад.

Шарики асосии тиҷоратии Тоҷикистон дар нимсолаи аввали соли ҷорӣ Русия буда, тайи 6 моҳ ҳаҷми муомилоти мол байни Тоҷикистону Русия наздики 470 млн. долларро ташкил додааст.

Дар ин давра Тоҷикистон бо Қазоқистон - ба маблағи 416 млн., Чин - 316 млн. ва Ӯзбекистон - ба 128 млн. доллар муомилоти молӣ анҷом додааст.

Хабарҳои моро дар Telegram пайгирӣ намоед, ба шабакаи мо бо суроғаи  https://t.me/asiaplus  ҳамроҳ шавед.