Вазорати нақлиёти Тоҷикистон ба автомашинаҳои боркаши раҳсипор ба Тоҷикистон, ки дар сарҳади байни Эрону Туркманистон дармондаанд, истифодаи роҳҳои дигарро барои бозгашт ба ватан тавсия медиҳад.

“Чанд рӯз аст, ки гузариши мошинҳои боркаши Тоҷикистон аз ҳудуди  Туркманистон маҳдуд карда шудааст. Айни ҳол дар гузаргоҳҳои сарҳадии Эрону Туркманистон ва Ӯзбекистону Туркманистон нақлиёти боркаши тоҷик намегузарад”, - хабар дода мешавад дар маълумоти сомонаи Вазорати нақлиёти ҶТ.

Дар ин робита, қайд мешавад дар маълумот, аз ин хотир  то ҳалли ин қазия Вазорати нақлиёт ба интиқолдиҳандагони Тоҷикистон  тавсия медиҳад, ки аз дигар масирҳо, яъне тавассути ҳудуди Озарбойҷон, Қазоқистону Туркманистон истифода кунанд.

“Ин роҳ тӯлонитар назар ба роҳи Туркманистон – Ӯзбекистон - Тоҷикистон аст, вале айни ҳол ягона илоҷ ҳамин аст” – таъкид мешавад дар маълумоти Вазорат.

Зимнан зикр мегардад, ки дар ин бора аз ҷониби Вазорати нақлиёт ба Вазорати корҳои хориҷӣ муроҷиат карда шуда, вале то ҳол аз ҷониби Туркманистон ҷавоби расмӣ наомадааст.

Тибқи баъзе маълумот, дар гузаргоҳи сарҳадии Лутфобод-Ортиқ, ки дар сарҳади Эрону Туркманистон воқеъ аст, айни замон беш аз 100 адад автомашинаҳои боркаши ба Тоҷикистон раҳсипор дармондаанд.

Хабарҳои моро дар Telegram пайгирӣ намоед, ба шабакаи мо бо суроғаи  https://t.me/asiaplus  ҳамроҳ шавед.