Ҳукумати Тоҷикистон баҳри беҳбуди самаранокӣ ва вазъи молиявии бахши энергетикии кишвар Барномаи солимгардонии ШСХК “Барқи тоҷик”-ро таҳия намуд, хабар медиҳад намояндагии Бонки ҷаҳонӣ дар Душанбе.

Дар маълумот қайд мешавад, ки ҳукумат аз Бонки ҷаҳонӣ ва дигар шарикони рушд дархост намудааст, ки ба ин барнома маблағгузорӣ кунанд.

Бонки ҷаҳонӣ кумак карданро тариқи воситаи маблағгузорӣ ба “Барнома барои натиҷа” ба нақша гирифтааст.

Дар назар аст, ки кумак баъди аз ҷониби ин ниҳоди молиявии байнулмилаӣ анҷом додани ҷараёни арзёбии низомҳои экологӣ ва иҷтимоӣ дар Тоҷикистон расонида шавад, ки ба Барномаи солимгардонии молиявии “Барқи тоҷик” марбутанд.

Қобили зикр аст, ки айни замон ширкати “Барқи тоҷик” дар вазъи душвори молиявӣ қарор дошта, ҳамасола натиҷаҳоро бо зиёни зиёд ҷамъбаст менамояд.

Ба аввали соли равон ҳаҷми умумии қарзи ширкат (бо назардошти воситаҳои ҷалбшуда барои амалисозии лоиҳаҳои энергетикӣ) 23,1 млрд. сомонӣ (наздики 2,5 млрд. доллар)-ро ташкил медиҳад.

Айни замон ҷараёни навсозии сохтори “Барқи тоҷик” дар арафаи анҷомёбӣ буда, дар назар аст, ки имсол он ба се ширкати мустақил – истеҳсол, интиқол ва тақсимоти барқ ҷудо карда мешавад.

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.