Тоҷикистон мувофиқи созишномаи имзошуда бо Афғонистон соли равон ба ин кишвар 1,5 млрд кВт/соат неруи барқ интиқол медиҳад, менависад ИНТЕРФАКС бо истинод ба муовини намояндаи расмии ҳаракати “Толибон” Иномулло Самангонӣ.

“Мутобиқи созишномаҳои нав байни Афғонистон, Тоҷикистон ва Ӯзбекистон, соли 2022 Тоҷикистон ба Афғонистон 1,5 млрд кВт/соат ва Ӯзбекистон - 2 млрд кВт/соат неруи барқ интиқол медиҳанд”, - гуфтааст Самангонӣ.

Таъкид шудааст, ки арзиши солонаи қарордодҳо мутаносибан 69 млн  ва 100 млн долларро ташкил медиҳад.

Қаблан ширкати “Барқи тоҷик” дар шарҳи имзои қарордод бо Афғонистон зикр кард, ки ин як қарордоди иловагии ҳанӯз соли 2008 баимзорасида ба созишномаи байни ҷонибҳо мебошад.

“Тибқи илова ба созишнома барои соли 2022, дар давраи баҳору тобистон (май-сентябр) Афғонистон аз Тоҷикистон ҳамарӯза 400 МВт/соат ва дар давраи тирамоҳу зимистон (октябр-апрел) - 25-30 МВт/соат барқ мегирад, ки “ба тавозуни умумии таъминот бо барқ дар кишвар таъсир намерасонад”, - зикр гардида буд дар хабар.

Барои 1 кВт/соат барқ Афғонистон 3 сент тариқи хати 110 кВ ва 4,5 сент - тариқи хати интиқоли барқи 220 кВ маблағ пардохт мекунад.

Бино ба маълумоти расмӣ, дар зарфи 11 моҳи соли ҷорӣ Тоҷикистон ба маблағи умумии ҳудуди 94 млн доллар ба хориҷи кишвар неруи барқ интиқол додааст, ки ду баробар зиёдтар нисбат ба ҳамин давраи соли 2020 аст.

Дар Telegram, Facebook, Instagram, OK ва ВК бо мо бимонед.

Лутфан, хабари муҳим, суол ва аксу видеоҳои ҷолибро ба Asia-Plus тавассути Viber, Telegram, Whatsapp, Imo ба рақами +992 93 792 42 45 фиристед.