Раҳбарияти ширкатҳои роҳи оҳани Тоҷикистон ва Қазоқистон дар бораи густариши минбаъдаи ҳамкориҳо ва рушди долонҳои нақлиётие, ки минтақаи Осиёи Марказиро бо бозорҳои ҷаҳонӣ пайваст месозад, тавофуқ ҳосил карданд. Дар ин бора хадамоти матбуотии Роҳи оҳани Қазоқистон хабар медиҳад.

Зимни дидору гуфтушуниди Комил Мирзоалӣ ва Талгат Алдибергенов, роҳбарони роҳи оҳани ду кишвар таъкид шудааст, ки ҳаҷми ҳамлу нақли молу маҳсулот ва бор байни Тоҷикистону Қазоқистон 15,1% афзуда, ҳаҷмии умумии он ба 5,9 млн тонна расидааст.

"Содирот аз Қазоқистон ба Тоҷикистон ба андозаи 7,6% - то 2,6 млн тонна зиёд шудааст. Асоси содиротро зироати ғалладона, орд, маҳсулоти нафтӣ, фулузот (металлҳо)-и сиёҳ, маъдани ранга ва равғани растанӣ ташкил додаанд", - навиштааст манбаъ.

Ҳамчунин, ҷонибҳо ҷиҳати идомаи кори муштарак дар робита ба баланд бардоштани рақобатпазирии хатсайрҳои роҳи оҳан, таҳкими робитаҳои тиҷоративу иқтисодӣ, ҳамгироии равандҳои логистикӣ ва рақамисозии ҳуҷҷатҳо тавофуқ ҳосил кардаанд.

Илова бар ин, ба тавофуқ расидаанд, ки ба рушди долонҳои байналмилалии нақлиётӣ, ки ба тақвияти имконоти транзитии минтақа муосидат мекунанд, таваҷҷуҳи хосса дода мешавад.

Акс аз торнамои railways.kz

Дар хабар таъкид мшавад, ки ҳамкорӣ байни ширкатҳои "Қазақстан темір жолы" ва "Роҳи оҳани Тоҷикистон" ба шарикии чандинсола асос ёфта, ба таъмини робитаи устувор ва мунтазам байни Тоҷикистон ва Қазоқистон равона шудааст.

Ба иттилои манбаъ, аз рӯи натиҷаҳои вохӯрӣ протокол дар бораи натиҷаҳои кор дар соли 2025 ва нақшаҳо барои соли 2026 ба имзо расидааст.

Ғайр аз ин, дар доираи сафар дидору гуфтушуниди Талгат Алдибергенов бо муовини аввали сарвазири Тоҷикистон Ҳоким Холиқзода ва вазири корҳои хориҷии Тоҷикистон Сироҷиддин Муҳриддин низ доир гардидааст.

Дар ҷараёни гуфтушуниди ҷонибҳо масоили таҳкими ҳамкории байнулмилалӣ баррасӣ шуда, самтҳои стратегии рушди имконоти транзитиву логисткиии ду кишвар муайян карда шудаанд.

Дар назар аст, ки афзоиши ҳаҷми боркашонӣ ва бунёди хатсайрҳои самараноки нақлиётӣ ба ҳамкории мутақобила байни кишварҳо такони иловагӣ мебахшанд.

Дар Telegram, Facebook ва Instagram бо мо бимонед.