Дирӯз, 14-уми апрел ду писарбачаи 4 ва 6-сола дар дарёи Шӯрак, воқеъ дар ҳудуди деҳаи Сафедмуни ҷамоати Қалъаи Лаби Оби ноҳияи Тоҷикобод ғарқ шуда, ҷон бохтаанд.

Дар ин бора Кумитаи ҳолатҳои фавқулода (КҲФ) иттилоъ дода, навиштааст, ҳодиса тақрибан соати 11-и рӯз рух додааст.

Ба навиштаи манбаъ, баъди рух додани ҳодиса давоми рӯз наҷотбахшони шуъбаи КҲФ ҷасади писарбачаи 6-соларо пайдо карда, ба волидонаш супоридаанд. Ҷасади кӯдаки 4-сола бошад, субҳи имрӯз, 15-уми апрел соати шаш 200 метр поёнтар аз ҳодиса дарёфт шудааст.

Мақомот сабаби ҳодисаро аз назорати волидон дур мондани кӯдакон гуфтаанд, ки дар натиҷа онҳо ба об афтода ғарқ шудаанд. 

Дар пайи ин ҳодиса, КҲФ аз волидон хостааст, ки кӯдаконро беназорат нагузоранд.

Ҳодисаҳои ғарқ шудани кӯдакон дар обу дарёҳои кишвар зиёд расонаӣ мешавад. Махсусан, бо оғози мавсими гармӣ аксари наврасон ба қоидаҳои бехатарӣ ҳангоми оббозӣ дар кӯлу дарёҳо риоя накарда, ба ҳалокат мерасанд.

Ёдрас мешавем, ки соли гузашта дар ҳамин мавсим Сафияхон Раҳматоваи 9-сола дар дарёи Сир ғарқ шуд ва ҷасадашро баъди моҳе дар яке аз каналҳои Ӯзбекистон дарёфт карданд.

Пештар аз ин хабари ғарқ шудани 5 кӯдак дар як шабонарӯз дар минтақаҳои гуногуни Тоҷикистон расонаӣ шуда буд.

Дар Telegram, Facebook ва Instagram бо мо бимонед.