Дар пайи садамае, ки шаби 4-уми июл дар шаҳри Истаравшан рух додааст, чаҳор аъзои як оила ҷон бохтаанд.

Як манбаъ аз ҳукумати шаҳри Истаравшан ба “Азия-Плюс” гуфт, ки бар асари ин садама як зани 51-сола бо се писараш, ки 18, 25 ва 30-сола буданд, ҷон бохтанд.

“Оилаи Тӯрабоевҳо аз маҳаллаи Гулистони шаҳри Истаравшан дар ду мошини сабукрав ба тамошои кӯҳҳои ноҳияи Шаҳристон мераванд. Дар як мошин модари 51-сола бо се писараш - Ҷавлон, Ҷасур ва Ҷовид Тудибоевҳо ва дар мошини дигар падари хонадон бо келину набераҳояш нишаста будаанд. Вақти бозгашт мошине, ки модари бо писаронаш нишаста буд, ба садама дуҷор мешавад ва чаҳор нафар вафот мекунанд”, - гуфт ин манбаъ.

Алишер Ҷумъазода, як корманди Шуъбаи БДА дар ноҳияи Шаҳристон хабари садама ва дар пайи он, марги чаҳор узви як оиларо тасдиқ карда, илова намуд, ки он дар километри 205-уми шоҳрони Душанбе – Чаноқ рух додааст. Ӯ гуфт, садамаро Шуъбаи БДА дар ноҳияи Шаҳристон сабт карда, барои таҳқиқи ба муфаттишони шаҳри Истаравшан ирсол кардааст.

“Пас аз таҳқиқ ва хулосаи экспертиза, сабаби садама муайян карда мешавад”,-гуфт Ҷумъазода.

Ба иттилои манбаъ дар ҳукумати шаҳри Истаравшан, ҷасади фавтидагонро рӯзи 5-уми июл дар зодгоҳашон маҳаллаи Гулистон ба хок супурдаанд.

Зикр кардан ба маврид аст, ки ин дуюмин садамаи пурқурбонӣ дар як ҳафтаи охир дар вилояти Суғд аст. Рӯзи 28-уми июни соли равон як садамае дар роҳи Хуҷанд–Мастчоҳ 7 тан ҷон бохта, 3 тани дигар захмӣ шуда буданд.

Тибқи иттилои расмӣ, соли гузашта дар пайи 1 ҳазору 233 садамаи нақлиётӣ 552 нафар (соли 2023 -1 ҳазору 111 садама –  519 кас) ҷон бохта, 1 ҳазору 353 нафар ҷароҳат бардоштаанд.  Мақомот мегӯянд, суръати баланд, вайрон кардани қоидаҳои сабқат ва ҷойивазкунӣ, риоя накардани фосила, гуфтугӯ бо телефони мобилӣ, омилҳои асосии садамаҳои нақлиётӣ мебошад.

Дар Telegram, Facebook ва Instagram бо мо бимонед.