Сардухтури Маркази бемориҳои рӯҳии виляоти Суғд ҳангоми порагирӣ бо далели шайъӣ боздошт шуд.

Аз Раёсати Агентии зиддифасод дар вилояти Суғд ба «Азия-Плюс» дар ин робита иттилоъ доданд, ки ба сардори раёсати мазкур шаҳрванди ноҳияи Бобоҷон Ғафуров Б.Р. муроҷиат намуда, изҳор доштааст, ки сардухтури маркази зикршуда барои додани хулосаи тиббӣ дар бораи муайян кардани вазъи рӯҳии писараш, ки нисбаташ парвандаи ҷиноӣ боз шудааст, аз ӯ 1000 доллари ИМА маблағ талаб карда, дар ниҳояти кор, баъди «савдо» ба гирифтани 600 доллари ИМА барои «хизматҳояш» розӣ шудааст.

Ба иттилои манбаъ, табиби 61-сола зимни порагирӣ бо далели шайъӣ дар ҳуҷраи кориаш боздошт шуда, нисбати ӯ мутобиқи моддаи 319, қ. 1-и Кодекси ҷиноии ҶТ (Гирифтани пора шахсан аз ҷониби мансабдор ё тариқи миёнарав) парвандаи ҷиноӣ боз ва тафтиши пешакӣ идома дорад.

Бино ба маълумоти Раёсати Агентии назорати давлатии молиявӣ ва мубориза бо коррупсияи ҶТ дар вилояти Суғд, нимсолаи аввали соли равон дар қаламрави минтақаи шимоли кишвар 19 далели гирифтани пора аз ҷониби шахсони мансабдор (ҳамин давраи соли гузашта – 22 далел) ба қайд гирифта шудааст.