Собиқ роҳбари маҳкумшудаи Ҳизби демократи Тоҷикистон Маҳмадрӯзи Искандаров, ки муддати 10 сол дар зиндони Душанбе адои ҷазо мекард, барои анҷоми мусоҳиба бо радиои Озодӣ ба зиндони наздикии шаҳри Ваҳдат интиқол дода шуд.

Аббосидин Ҳомидов, бародарзодаи Маҳмадрузӣ Искандаров, рӯзи 18-уми август ба Радиои Озодӣ гуфтааст, ки баъди нашри мусоҳибаи сиёсатмадори зиндонӣ бо Радиои Озодӣ, намояндагони Раёсати ислоҳии маҳбаси вазорати адлия ӯро даъват карда ва ҳамчун ҷазо ба зиндони “Кирпичний” интиқол додаанд.

Ба гуфтаи Ҳомидов, мақомот хостаанд, ки аз ҳамин роҳ иртиботи Маҳмадрузӣ Искандаровро бо хабарнигорон қатъ кунанд.

Як мақоми раёсати маҳбасҳои вазорати адлия ба Радиои Озодӣ гуфтааст, ки “се рӯз аст, ки Маҳмадрузӣ Искандаров дар маҳбаси рақами 4/7 давраи карантинро пушти сар карда, бо қоидаҳои ин маҳбас шинос шуда, баъди 9 рӯз барои адои давраи ҷазо дар ҳамин маҳбас мемонад.”

Санаи 11 август радиои Озодӣ мусоҳибаеро бо Маҳмадрӯзӣ Искандаров интишор намуд, ки дар он сиёсатмадор дар робита ба имзои Созишномаи ризоияти миллӣ ва истиқрори сулҳ дар Тоҷикистон изҳор доштааст, ки «наҳваи сулҳе, ки ба даст омад, нодуруст буд ва ин як сулҳи дурӯғин буд».

Ёдрас мекунем, ки собиқ пешвои Хизби демократи Тоҷикистон Маҳмадрӯзӣ Искандаров соли 2005 ба терроризм, ғайриқонунӣ нигаҳдории силоҳ, суиқасд ба куштор, дуздии воситаҳои давлатӣ дар ҳаҷми ниҳоят зиёд ва суистифода аз ваколатҳои мансабӣ гунаҳкор дониста шуда, ба 23 соли зиндон маҳкум шуд.