Суди ноҳияи Фирдавсии шаҳри Душанбе муовини ректор (проректор)-и Донишгоҳи давлатии тиббии Тоҷикистон (ДДТТ) оид ба қисми таълимӣ, доктори илмҳои тиббӣ, мутахассиси урология Дилшод Солеҳовро ба 8 соли зиндон маҳкум кард.

Дилшод Солеҳов. Акс аз бойгонӣ
Акс аз сомонаи Донишгоҳи тиббӣ

Ба гуфтаи Музаффар Абдуллозода, муовини суди ноҳияи Фирдавсӣ муовини ректори донишгоҳ дар содир намудани ҷиноят мутобиқи моддаи 319, қисми 4-и Кодекси ҷиноии Тоҷикистон (Гирифтани пора) айбдор эътироф шудааст.

Зимнан зикр гардид, ки ҳамчунин амволи Солеҳов мусодира шуда, боз ӯ ба муддати панҷ сол аз ишғоли вазифаҳои муайян маҳрум карда мешавад.

Қаблан иттилоъ дода будем, ки Дилшод Солеҳов ба гирифтани пора дар ҳаҷми 16 ҳазор доллар гумонбар дониста шуда, ин маблағро аз падари довталаби аз имтиҳони дохилшавӣ нагузашта бо ваъдаи ба Донишгоҳ қабул кардани писараш ба сифати шаҳрванди Ҳиндустон гирифтааст.

Проректори Донишгоҳи тиббӣ аввали моҳи сентябр боздошт шуда, баъдан ба ивази баёноти тарк накардани маҳалли зист аз ҳабс озод раҳо гардида буд.