Суди шаҳри Хуҷанд, имрӯз рӯзноманигор ва роҳбари дастаи «КВН Тоҷикистон» Хайрулло Мирсаидовро ба 12 соли зиндони низомаш шадид маҳкум кард.

Муовини раиси суди шаҳри Хуҷанд, ҳамзамон раисикунандаи ин мурофиа Ҷӯрахон Раҳмон изҳор намуд, ки агар Мирсаидов зиёни ба давлат расонидааш дар ҳаҷми 123 ҳазору 913 сомониро бармегардонд, аз ҳукми зиндон халос мешуд, лекин ба ҳар ҳол, ба Мирсаидов лозим меояд, ки ин маблағро ба давлат пардохт намояд.

Хайрулло Мирсаидов аз рӯи ҳамаи айбномаҳои пешниҳодшуда - азхудкунӣ ё камомади воситаҳои давлатӣ, сохтакории ҳуҷҷатҳо ва дидаву дониста маълумоти бардурӯғ додан гунаҳкор эътироф гардид.

«12 сол ҷазои хеле сангин аст ва мо ният дорем, ки аз болои ин ҳукми суд ба зинаи болоӣ шикоят барем», - изҳор дошт ба «Азия-Плюс» Дилафрӯз Самадова, адвокати Мирсаидов.

Ӯ ҳамчунн қайд кард, ки суд дар ҳеҷ яке аз айбномаҳои пешниҳодшуда гуноҳи Хайрулло Мирсаидовро исбот накард.

Хабарҳои моро дар Telegram пайгирӣ намоед, ба шабакаи мо бо суроғаи  https://t.me/asiaplus  ҳамроҳ шавед.