Айбдоркунандаи давлатӣ аз судяи Суди олӣ дархост намуд, ки Ҳусейн Абдусамадов ба ҳабси абад маҳкум шавад. Ҳусейн Абдусамадов роҳбари гурӯҳест, ки тобистони имсол дар Данғара ба сайёҳони хориҷӣ ҳамла карда буд.

Тавре ба “Азия-Плюс” як манбаъ аз Суди олии Тоҷикистон хабар дод, дар мурофиаи судӣ оид ба баррасии парвандаи қатли бераҳмонаи чор сайёҳи велосипедрони хориҷӣ намояндаи Прокуратураи генералии ҷумҳурӣ аз суд дархост намуд, ки роҳбари гурӯҳ Ҳусейн Абдусамадов ба ҳабси абад маҳкум карда шавад.

Нисбати Ҳусейн Абдусамадов мутобиқи якчанд моддаи Кодекси ҷиноии ҶТ, аз қабили куштор бо бераҳмии махсус, терроризм, ифротгароӣ, ташкили гурӯҳи ҷиноятпеша, барқасдона нобуд кардани амвол, ҷалби шаҳрвандон барои иштирок дар амалиёти ҷангӣ дар хориҷи кишвар ва ғайра парвандаи ҷиноӣ боз шудааст.

Бино ба иттилои манбаъ, Абдусамадов ба гуноҳаш иқрор шуда, вале пушаймонӣ изҳор накардааст. “Дар сухани охирини худ Абдусамадов изҳор намуд, ки аз кирдори содиркардааш пушаймон нест”, - гуфт манбаъ.

Содир гардидани ҳукм нисбати ҳамаи иштирокҷиёни парванда оид ба куштори бераҳмонаи сайёҳони хориҷӣ рӯзи 21 ноябр дар назар аст.

Хабарҳои моро дар Telegram пайгирӣ намоед, ба шабакаи мо бо суроғаи  https://t.me/asiaplus  ҳамроҳ шавед.