Прокурори генералии Тоҷикистон Юсуф Раҳмон имрӯз ба журналистон хабар дод, ки 14 маҳбусе, ки зимни интиқол аз Хуҷанду Истаравшан ба Душанбе ҳалок шуданд, бешубҳа заҳролуд шуда буданд.

Лекин, ба гуфтаи ӯ, ба коршиносон ҳоло муяссар нашудааст, аз чӣ - нон ё чизи дигар заҳролуд шудани онҳоро ошкор намоянд.

“Бо масъулият изҳор мекунам, ки ҳеҷ кадоме аз маҳбусон аз лату кӯб ҳалок нашудааст, дар онҳо осори захму ҷароҳат ва зӯроварӣ вуҷуд надошт”, - гуфт прокурори генералӣ.

Ӯ ҳамчунин қайд кард, ки қаблан дар зиндонҳои шаҳрҳои Кӯлобу Хоруғ низ далелҳои заҳролудшаии маҳбусон аз хӯрок ба қайд гирифта шудааст, “лекин дар ин ҳодисаҳо касе ба ҳалокат нарасида буд”.

Ёдрас мекунем, ки тибқи маълумоти Сарраёсати иҷрои ҷазои ҷиноятии Вазорати адлияи Тоҷикистон, санаи 7 июл 128 нафар маҳбусон, ки 8 нафарашон занонанд, дар се автомашинаи махсус аз Хуҷанду Истаравшан ба муассисаҳои ислоҳии шаҳрҳои Душанбеву Норак ва ноҳияи Ёвон интиқол дода шуданд.

Дар мавзеи Майхўраи ноҳияи Варзоб яке аз маҳбусон 3 адад ноне (хлеб), ки бо худ ҳамчун дастовези муқаррарӣ доштааст, тибқи маъмул ба 16 нафар маҳбус тақсим кардааст. Дар натиҷа пас аз истеъмоли он 16 нафар маҳбусон заҳролуд шуда, 14 нафарашон фавтиданд.

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.