Имрӯз, 3-юми июн дар Додгоҳи ноҳияи Сино мурофиаи парвандаи Баҳрулло Юсуфзода, ронандае, ки зери чархи мошини ӯ Ҷасур Акрамови 16-сола, як сокини пойтахт ҷон бохт, идома ёфт. Он дирӯз оғоз шуда буд.

Дар мурофиаи навбатӣ вакилони дифоъ ва наздикони ду тараф ширкат карданд. Аммо ба он рӯзноманигори “Азия-Плюс” боз ҳам роҳ дода нашуд. Ҳарчанд Фирдавс Акрамов, падари марҳум Ҷасур Акрамов, иддао дорад, ки аз додгоҳ хостааст, мурофиа боз баргузор гардад.

Ҳамин тавр, дар ҷараёни мурофиа ҷонибҳо чӣ гуфтанд, барои “Азия-Плюс” номаълум монд.

Танҳо пас аз анҷоми мурофиа, Фирдавс Акрамов ба “Азия-Плюс” гуфт, “ин навбат шоҳиди ҳодиса - тағои гумонбар пурсида шуд”.

Ба қавли Фирдавс Акрамов, “тағои гумонбар соҳиби мошинест, ки зери чархи он Ҷасур Акрамов ҷон дод”. Назари худи тағои гумонбар номаълум аст. Хабарнигори “Азия-Плюс” натавонист ӯро дар саҳни додгоҳ пайдо кунад ва назарашро пурсад.

Аммо Зарнигор Шоева, модари Баҳрулло Юсуфзода пас аз анҷоми мурофиаи навбатӣ ба “Азия-Плюс” гуфт, ки “ҳамчун модар бо дарди хонаводаи марҳум шарик ҳаст, чун бо хатои фарзандаш ин ҳодиса рух дод”.

“Фарзанди ман намехост, ки чунин ҳодиса рух диҳад, ӯ низ соҳиби се фарзанд аст. Аз ин сабаб, писарам ба волидони Ҷасур Акрамов нома навишта, узр хост”, - гуфт Зарнигор Шоева.

 

Акс аз "Азия-Плюс"

Вале Фирдавс Акрамов гуфт, ки “то ин замон мактубе аз ҷониби Баҳрулло Юсуфзода дарёфт накардаанд”.

Бояд гуфт, Фирдавс Акрамов дар мактуби бози худ ба номи роҳбарияти кишвар ба корманди милитсия будани падари гумонбар ишора карда, аз он нигаронӣ карда буд, ки эҳтимол аст ӯ “аз ҷазои одилона раҳо ёбад”.

Дар робита ба ин суханони Фирдавс Акрамов, имрӯз пас аз мурофиа вакили дифои гумонбар гуфт, “падари зерҳимояаш чун нозири минтақавӣ фаъолият мекунад ва қарор аст, дар мурофиаи навбатӣ иштирок кунад”.

Мурофиаи навбатӣ ба ҳафтаи дигар, 11-уми июн гузошта шуд.

Ёдрас мешавем, ки рӯзи 2-юми июн дар Додгоҳи ноҳияи Сино мурофиаи аввалин дар доираи ин парванда баргузор шуд. Ба мурофиа рӯзноманигор роҳ дода нашуд.

Садамаи нақлиётӣ бо иштироки Баҳрулло Юсуфзода рӯзи 3-юми апрели соли 2025, тахминан соати 16:30 дақиқа дар кӯчаи Б.Ғафурови ноҳияи Синои шаҳри Душанбе рух дод, ки дар натиҷа Ҷасур Акрамови 16-сола ҷароҳат бардошта, ҳангоми ба беморхона бурдан, ба ҳалокат расид. Сабаби ҳодиса “аз уҳдаи идораи нақлиёт набаромадан”-и Юсуфзода гуфта мешавад.

Бар зидди Баҳрулло Юсуфзода бо гумони “вайрон кардани қоидаҳои ҳаракати роҳ ва истифодаи воситаҳои нақлиёт, ки боиси марги инсон мегардад” (қисми 4 моддаи 212 Кодекси ҷиноятии ҶТ) парвандаи ҷиноӣ ифтитоҳ шудааст. Ин банди қонунгузорӣ аз панҷ то даҳ соли зиндонро пешбинӣ мекунад.

Ин қазия замоне расонаӣ гардид, ки Фирдавс Акрамов, падари марҳум Ҷасур Акрамов бо нашри як номаи саркушода ба унвонии Эмомалӣ Раҳмон, раиси ҷумҳури кишвар, Рустами Эмомалӣ, шаҳрдори Душанбе ва Ҳабибулло Воҳидзода, додситони кул хоста буд, ки парвандаи ҷиноии марги писарашро таҳти назорати шахсӣ гиранд.

Дар Telegram, Facebook ва Instagram бо мо бимонед.