Боздошти Фаррух Мақсудзода, сардори Раёсати тандурустӣ дар вилояти Суғдро Ҷамолиддин Абдуллозода, вазири тандурустӣ ва ҳифзи иҷтимоии аҳолӣ тасдиқ кард, аммо гуфт, шояд боздошти ӯ ба фаъолияти шахсияш рабт дошта бошад.

Дар бораи боздошти Фаррух Мақсудзода моҳи декабри соли 2025 хабарҳои тасдиқнашуда паҳн шуд, аммо он замон мақомоти расмӣ ҳеҷ иттилое надоданд.

Ҷамолиддин Абдуллозода рӯзи 28-уми январ зимни нишасти хабарӣ бори аввал расман тасдиқ кард, ки ин зердасташ дар вилояти Суғд боздошт шудааст, аммо нагуфт, ки Фаррух Мақсудзодаро кадом ниҳод ва барои чӣ боздошт кардааст.

Ӯ танҳо зикр кард, ки “ба фаъолияти касбиаш эроде набуд” ва боздошти ӯ “шояд ба фаъолияти шахсии ӯ рабт дошта бошад”.

Манобеи мо дар мақомоти вилояти Суғд тасдиқ карданд, ки Мақсудзода чанд муддат ин ҷониб дар кор нест, аммо бо баҳонаи “беморӣ” ва “рухсатӣ” дақиқ нагуфтанд, ки ӯ дар куҷо аст.

Як бародари Мақсудзода боздошти бародарашро рад карда, гуфт, “рӯзи душанбе (яъне 19-уми январи соли 2026) аз сафар меоянд  ва бо худашон саволу ҷавоб мекунед”. Аммо тамоси такрорӣ бо ӯ ғайриимкон шуд.

Модари Фаррух Мақсудзода низ рӯзи 16-уми январ кӯтоҳ гуфт, ки “писарам як ҷойи дур рафтагӣ, ман бо журналисто гап намезанам. Намедонам кай меояд”.

Радиои Озодӣ бо такя ба манобеи худ навишт, ки “Мақсудзодаро мақомоти амниятии вилояти Суғд боздошт карда ва иттиҳоми алайҳи ӯро бо ҷурми “тамаъҷӯӣ” тафтиш доранд”. Аммо ба ин расона ҳам касе расман иттиҳоми алайҳи Мақсудзода эълоншударо тасдиқ накардааст.

Бояд гуфт, Фаррух Мақсудзода тобистони соли 2025 ба вазифаи сардори Раёсати тандурустии вилояти Суғд таъин шуда буд. Вай як давраи гузашта ҳам дар ин симмат кор кард ва дар байн Сардухтури беморхонаи вилоятӣ буд.

Дар Telegram, Facebook ва Instagram бо мо бимонед.