Намояндаи махсуси президенти Русия дар Афғонистон Замир Кобулов кӯшиши убури марзи Афғонистону Тоҷикистон аз ҷониби ҷангиёнро аз эҳтимол дур намедонад.

«Маълумоте мавҷуд аст, ки як қатор гурӯҳҳои ифротгаро бо шумули Толибону Давлати исломӣ дар ин минтақаҳо марказҳои омодагии ҷангиён ташкил кардаанд. Амалан имрӯз ду макони тамаркузи зиёди ифротгароён вуҷуд дорад, ки яке дар музофотҳои Бадахшону Қундуз ва дигарӣ дар музофотҳои Бодғису Фарёб амал мекунад», - гуфт ӯ дар мусоҳиба ба «Азия-Плюс».

Дар ҳамин ҳол, З.Кобулов таъкид дошт, ки ҷангиёни мустақар дар ин музофотҳо ба гурӯҳҳои гуногуни этникӣ шомил буда, вале аксаран тоҷикону қирғизҳо ва ӯзбеконанд ва ҳамчунин арабҳову уйғурони чинӣ ва зодагони Қафқози Шимолӣ низ ҳузур доранд.

Ба гуфтаи ӯ, ахири моҳи апрел вазъ дар Қундуз шиддат гирифта, толибон кӯшиш карданд, ки маркази маъмуриро ишғол намуда, як қатор қитъаҳои роҳи мошингарди пайвасткунандаи музофот бо Кобулро зери назорат гиранд.

«Дар партави ин ҳодисаҳо сурат гирифтани кӯшишҳои убури марзи Афғонистон бо кишварҳои Осиёи Марказӣ, аз ҷумла Тоҷикистонро аз эҳтимол дур намедонам, аммо мутмаинам, ки раҳбарияти ин давлатҳо ба ин гуна сенарияҳо омода буда, аллакай як қатор тадбирҳои муайяни боздоранда рӯйи кор гирифт. Чунин тадбирҳо ҳамчунин дар шакли дастаҷамъона, аз ҷумда дар доираи СААД низ андешида мешаванд», - изҳор дошт З.Кобулов дар мусоҳиба ба «Азия-Плюс».