Вазири корҳои хориҷии Тоҷикистон Сироҷидин Аслов рӯзи 12 октябр котиби давлатии Вазорати корҳои хориҷии Муғулистон Дамба Ганхуягро, ки барои иштирок дар нахустин машваратҳои сиёсии Тоҷикистону Муғулистон дар шаҳри Душанбе қарор дорад, ба ҳузур пазируфт.

Бино ба иттилои Вазорати корҳои хориҷии ҶТ, дар рафти суҳбат масъалаҳои мубрами рушди муносибатҳои дуҷониба ва бисёрҷонибаи Тоҷикистон ва Муғулистон дар заминаи татбиқи мувофиқатҳое, ки қаблан дар натиҷаи мулоқоти роҳбарони ду кишвар моҳи сентябри соли 2014 дар Душанбе ҳосил шуданд, мавриди табодули назар қарор гирифтанд.

Ҷонибҳо ҳамчунин масъалаҳои таҳкими пояи шартномавию ҳуқуқии ҳамкориҳои мутақобилан судмандро дар арсаҳои мухталиф баррасӣ намуданд.

Ба иттилои манбаъ, ҳамин рӯз дар шаҳри Душанбе таҳти роҳбарии муовини вазири корҳои хориҷии ҶТ Низомиддин Зоҳидӣ ва котиби давлатии Вазорати корҳои хориҷии Муғулистон Дамба Ганхуяг нахустин машваратҳои сиёсии ду кишвар баргузор шуданд.

Гуфта мешавад, дар рафти машваратҳо табодули назари судманд роҷеъ ба ҳолат ва дурнамои рушди муносибатҳои дуҷониба дар арсаҳои сиёсӣ, иқтисодию тиҷоратӣ, кишоварзӣ, саноатӣ, илмию фарҳангӣ ва консулӣ сурат гирифт. Роҳҳои татбиқи амалии мувофиқатҳое, ки аз натиҷаи музокироти сатҳи олӣ моҳи сентябри соли 2014 дар Душанбе бармеояд, баррасӣ ва тарҳрезӣ карда шуданд.

Ҷонибҳо ҷиҳати тақвияти ҳамкориҳои судманд дар ҳамаи самтҳое, ки ба тавсеаи минбаъдаи робитаҳои дуҷонибаю бисёрҷониба мусоидат хоҳанд кард, омодагии худро изҳор намуданд.