Роҳбари ҳаракати ҷамъиятии «Муҳоҷирони меҳнатии тоҷик»  Каромат Шарипов изҳор намуд, ки дар манзилаш дар Маскав кофтуков гузаронида мешавад.

Дар саҳифааш дар шабакаи иҷтимоии Фейсбук Каромат Шарипов навиштааст, субҳи имрӯз кормандони мақомоти ҳифзи ҳуқуқ ба манзилаш барои кофтуков гузаронидан омадаанд.

Ӯ қайд кардааст, ки 2 июни соли 2016 Суди олии Русия дар ҷаласаи кушоди судӣ парвандаи маъмурӣ оид ба аризаи даъвогии Вазорати адлияи Русияро дар бораи барҳам додани ҳаракати умумирусигии ҷамъиятии «Муҳоҷирони меҳнатии тоҷик» баррасӣ кард.

Сарфи назар аз мавқеъи Вазорати адлияи Русия дар симои намояндагони он, ки ба барҳамдиҳии ташкилоти ҷамъиятӣ исрор варзидаанд, Суди олии Русия қарор кардааст, ки «барои созиши тарафҳо то 1 августи соли 2016 муҳлат дода шуда, то анҷоми ин муҳлат истеҳсолоти парванда боздошта шавад».

Соати 6.15 дақиқаи субҳи имрӯз бошад, дар манзили Каромат Шарипов кофтуков сар шудааст. «Ин далел гувоҳи он аст, ки аз байн бурдани ҳаракати «Муҳоҷирони меҳнатии тоҷик» ва бадном кардани раиси ҳаракат Каромат Шарипов фармоишӣ буда, «фармоишгар» ҳам дорад», - гуфта мешавад дар маълумот.

Ёдрас мекунем, ки Суди олии Русия бо талаби Вазорати адлияи ин кишвар масъалаи барҳам додани ҳаракати ҷамъиятии умумирусиягии «Муҳоҷирони меҳнатии тоҷик»-ро баррасӣ мекунад.