Вазири корҳои хориҷии Тоҷикистон Сироҷиддин Аслов имрӯз дар кори ҷаласаи Шӯрои вазирони корҳои хориҷии кишварҳои узви СААД дар шаҳри Ереван иштирок мекунад.

Бино ба иттилои Вазорати корҳои хориҷии ҶТ, дар чаҳорчӯби ин сафар, ки рӯзи 2 июл сурат гирифта буд, мулоқоти ӯ бо Президенти Ҷумҳурии Арманистон Серж Саргсян ва вазири  корҳои хориҷии ин кишвар Эдвард Налбандян доир гардид.

Гуфта мешавад, дар рафти мулоқот, ҷонибҳо доираи васеъи ҳамкориҳои дуҷонибаро мавриди муҳокима қарор дода, доир ба масъалаҳои мубрами минтақавӣ ва байналмилалӣ, инчунин ҳамкорӣ дар чаҳорчӯбаи созмонҳои байналмиллалӣ мубодилаи афкор намуданд.

Ҷонибҳо оид ба тасмимгирӣ ҷиҳати рушди минбаъдаи робитаҳои сиёсии дуҷониба, равобити байнипарламентӣ, инчунин тавсеаи ҳамкориҳо оид ба доираи васеи муносибатҳои мутақобилаи иқтисодӣ ва гуманитарӣ  ибрози назар карданд.

Қобили зикр аст, ки дар ҷаласаи мазкур, ки  таҳти раёсати вазири корҳои хориҷии Арманистон Эвард Налбандян доир мегардад,  масоили муҳими таъмини амнияти минтақавӣ ва байнулмилалӣ, тамоили рушди вазъ дар Афғонистон, Сурия ва дигар минтақаҳои низоъҳои мусаллаҳона, ҳамкории мутақобилаи кишварҳои узви Созмон дар арсаи байнулмилалӣ дар шароити вазъи мавҷуда дар ҷаҳон баррасӣ мешаванд.

Ҳамчунин вазирони корҳои хориҷии кишварҳои узви СААД лоиҳаи Стратегияи амнияти дастаҷамъии СААД дар давраи то соли 2025 ва ҷанбаҳои сиёсати хориҷии муқовимат ба терроризм ва ифротгароии байнулмилалиро низ мавриди баррасӣ қарор медиҳанд.