Дар остонаи сафари расмии Президенти Туркманистон Гурбонгулӣ Бердимуҳаммедов ба Тоҷикистон мулоқоти Вазири корҳои хориҷии Тоҷикистон Сироҷидин Аслов бо Муовини Раиси Девони Вазирон, Вазири корҳои хориҷии Туркманистон Рашид Мередов доир гардид.

Бино ба иттилои дафтари матбуоти Вазорати корҳои хориҷии ҷумҳурӣ, ҷонибҳо рафти омодагиҳо ба сафари расмии Президенти Туркманистон ба Тоҷикистонро мавриди баррасӣ қарор дода, иқдомҳоро ҷиҳати бобарор ташкил намудани сафари мазкур ҳамоҳанг намуданд.

Гуфта мешавад, зимни мулоқот вазирони корҳои хориҷии ду кишвари дӯсту бародар дар мавриди вазъ ва дурнамои муносибатҳои дуҷониба миёни Тоҷикистон ва Туркманистон, роҳҳои таҳкими ҳамкориҳои мутақобилан судманд байни кишварҳо дар самтҳои гуногун ва инчунин доир ба масъалаҳои мубрами байналмилалӣ ва минтақавӣ табодули афкор намуданд.