Дар анҷумани навбатии 14-уми ҳисоботӣ-интихоботии Ҳизби демократи Тоҷикистон (ҲДТ), ки охири ҳафтаи сипаришуда дар Душанбе баргузор шуд, вакили палатаи поёнии парлумони ҷумҳурӣ Саидҷаъфар Исмонов раиси ҳизб интихоб шуд.

Тавре ба «Азия-Плюс» як манбаъ аз Шӯрои сиёсии ҲДТ дар ин робита иттилоъ дод, интихоби пешвои ҳизб бар асоси алтернативӣ доир гардида, ба ҷонибдории раиси амалкунандаи ҳизб Саидҷаъфар Исмонов - 69 нафар ва ҳарифи ӯ, роҳбари ташкилоти ҳизб дар вилояти Суғд Абдуҷаббор Юлдошев - 9 нафар вакилони анҷуман раъй доданд.

Зимнан зикр гардид, ки Таваралӣ Зиёзода, Аҳмадшоҳ Комилзода, Ҳикматулло Саидиён, Абдуҷаббор Юлдошев, Зуҳро Мирзоева ва Диловар Холов муовинони раиси ҳизб интихоб шуданд.

Ҳизби демократи Тоҷикистон соли 1991 таъсис ёфта, раиси аввали он Шодмон Юсуф буд, ки феълан дар шаҳри Вена, пойтахти Австрия зиндагӣ мекунад. Баъди имзои Созишномаи ризоияти миллӣ ва истиқрори сулҳ дар Тоҷикистон ҳизбро Маҳмадрӯзӣ Искандаров ба роҳбарӣ гирифт.

Охири соли 2006 пас аз ба муҳлати 23 соли зиндон маҳкум шудани Маҳмадрӯзӣ Искандаров, Вазорати адлияи Тоҷикистон Масъуд Собировро раиси нави ҲДТ эътироф кард. Ҳизб ба ду ҷиноҳ тақсим шуд, ки якеро Саидҷаъфар Исмонов ва дигареро Раҳматулло Валиев, муовини раиси ҲДТ роҳбарӣ мекарданд.

Дар анҷумани ғайринавбатии ҲДТ моҳи декабри соли 2012 Саидҷаъфар Исмонов раиси ҳизб интихоб шуд. Он замон ба ин вазифа Саидҷаъфар Исмонов ва Равшанбек Аҳмедов довталабӣ мекарданд. Аксари вакилон (85 нафар) номзадии Исмоновро пазируфтанд. Мамлакат Ҷайчиева, раиси кумитаи тадорукоти анҷуман аз иштирок дар интихоби раиси нави ҲДТ даст кашид.

Қобили зикр аст, ки Ҳизби демократии Тоҷикистон имрӯз дар сафҳояш ҳудуди 20 ҳазор нафар шаҳрвандони кишварро муттаҳид мекунад.