Дар чаҳорчӯби сафари расмии сарвари давлати Тоҷикистон ба Покистон байни кишварҳо санадҳои нави ҳамкорӣ ба имзо расиданд.

Тавре ки хадамоти матбуоти президент хабар медиҳад, зимни суханронӣ дар нишасти матбуотӣ пас аз музокирот бо сарвазири Ҷумҳурии Исломии Покистон Шаҳбоз Шариф сарвари давлати Тоҷикистон изҳор намуд, ки мувофиқаҳои бадастомада дар баробари санадҳои   баимзорасида, ба муносибатҳои байнидавлатии ду кишвар такони тоза хоҳанд бахшид.

Сурат: хадамоти матбуоти сарвари давлат

“Дар соҳаи нақлиёт мо омодагии худро барои тавсеаи ҳамкориҳо, аз ҷумла ҷиҳати роҳ ёфтани Тоҷикистон ба бандарҳои баҳрии Қарочӣ ва Гвадари Покистон бори дигар таъкид кардем”, - иброз дошт Эмомалӣ Раҳмон.

Зикр шуд, ки ҷиҳати идома додани ҳамкориҳо дар татбиқи лоиҳаҳои энергетикӣ, аз ҷумла лоиҳаи КАСА-1000, ҳавасмандӣ ба ҳузури ширкатҳои покистонӣ дар Тоҷикистон ва таъсиси корхонаҳои муштарак, инчунин мушкилоти минтақавӣ табодули афкор сурат гирифт.

Гуфта мешавад, президенти Тоҷикистон аз Шаҳбоз Шариф даъват ба амал овард, ки дар вақти барояш муносиб ба Тоҷикистон ташриф орад.

Сурат: хадамоти матбуоти сарвари давлат

Сипас дар ҳузури президенти Тоҷикистон Эмомалӣ Раҳмон ва сарвазири Покистон Шаҳбоз Шариф санадҳои зерини ҳамкорӣ ба имзо расиданд:

- Изҳороти муштараки ду кишвар;

Сурат: хадамоти матбуоти сарвари давлат

Созишномаи тиҷорати транзитӣ байни Ҳукумати Ҷумҳурии Тоҷикистон ва Ҳукумати Ҷумҳурии Исломии Покистон;

- Ёддошти тафоҳум дар бораи барқарор намудани муносибатҳои бародаршаҳрӣ байни шаҳри Душанбеи Ҷумҳурии Тоҷикистон ва шаҳри Исломободи Ҷумҳурии Исломии Покистон;

- Созишномаи байни Ҳукумати Ҷумҳурии Тоҷикистон ва Ҳукумати Ҷумҳурии Исломии Покистон оид ба ҳамкорӣ дар соҳаи саноат ва технологияҳои нав;

- Ёддошти тафоҳум байни Хадамоти гумруки назди Ҳукумати Ҷумҳурии Тоҷикистон ва Хадамоти гумруки Ҷумҳурии Исломии Покистон (Идораи федеролии пардохтҳои Покистон) оид ба ташкили мубодилаи электронии маълумот;

- Созишнома байни Агентии стандартизатсия, метрология ва нозироти савдои назди Ҳукумати Ҷумҳурии Тоҷикистон ва Раёсат оид ба стандратҳо ва назорати сифати Ҷумҳурии Исломии Покистон (PSQCA), Вазорати илм ва технологияи Ҷумҳурии Исломии Покистон оид ба ҳамкорӣ дар соҳаи стандартизатсия, метрология ва баҳодиҳии мутобиқат;

Сурат: хадамоти матбуоти сарвари давлат

- Созишнома байни Ҳукумати Ҷумҳурии Тоҷикистон ва Ҳукумати Ҷумҳурии Исломии Покистон оид ба ҳамкорӣ дар мубориза бо муомилоти ғайриқонунӣ ва суистеъмоли воситаҳои нашъадор, моддаҳои психотропӣ ва прекурсорҳои онҳо;

- Ёддошти тафоҳум байни Академияи миллии илмҳои Тоҷикистон ва Шурои таҳқиқоти захираҳои оби Ҷумҳурии Исломии Покистон оид ба ҳамкорӣ дар соҳаи таҳқиқоти бунёдӣ;

- Ёддошти тафоҳум байни Донишгоҳи миллии Тоҷикистон ва Донишгоҳи Пешовари Ҷумҳурии Исломии Покистон ба имзо расиданд.

Дар Telegram, Facebook, Instagram, OK ва ВК бо мо бимонед.