Бо фармонҳои президенти Тоҷикистон Эмомалӣ Раҳмон дар Созмони ҳамкории иқтисодӣ (СҲИ) ва Созмони байналмилалии сайёҳӣ (СБС)-и СММ дар Шоҳигарии Испания намояндагони нави Тоҷикистон таъин шуданд.

Бино ба иттилои хадамоти матбуоти сарвари давлат, сафири Тоҷикистон дар Эрон Низомиддин Зоҳидӣ ҳамзамон Намояндаи доимии Тоҷикистон дар назди Созмони ҳамкории иқтисодӣ таъин карда шуд.

Бо фармони дигари сарвари давлат, сафири Тоҷикистон дар Конфедератсияи Швейтсария Ҷамшед Ҳомидов ҳамзамон Намояндаи доимии Тоҷикистон дар назди Созмони байналмилалии сайёҳии СММ дар Шоҳигарии Испания таъин гардид.

Созмони ҳамкории иқтисодӣ - ташкилоти байнидавлатии иқтисодии  минтақавӣ  ба шумор  рафта,  онро  соли  1985  Эрону Покистон ва Туркия бо мақсади пешбурди ҳамкориҳои иқтисодӣ, техникӣ ва фарҳангӣ миёни кишварҳои узви Созмон таъсис доданд.

Имрӯз Эрон, Покистон, Туркия, Қазоқистон, Озарбойҷон, Афғонистон, Қирғизистон, Тоҷикистон, Туркманистон ва Ӯзбекистон аъзои СҲИ мебошанд. Котибот ва шуъбаи фарҳанги Созмони ҳамкории иқтисодӣ дар Теҳрон, дафтари иқтисоди он дар Туркия ва дафтари илмии он дар Покистон воқеъ аст.

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.