- Сабаби ба сари худ тир холӣ кардани сарбози артиши Тоҷикистон Наҷмиддин Қаюмовро баъди баҳуш омаданаш метавон ошкор намуд, - изҳор дошт ба «Азия-Плюс» як манбаъ аз Вазорати мудофиаи ҷумҳурӣ.

Бино ба иттилои манбаъ, шахсони масъули вазорат доимо дар Маркази миллии тиббӣ навбатдоранд. «Сабаби қасди худкушӣ кардани сарбоз метавонад вазъи оилавӣ ё муносибатҳои ғайриоинномавӣ бошад», - тахмин кард манбаъ.

Зимнан зикр гардид, ки сарбози захмишуда айни замон дар шуъбаи эҳёгарӣ ва зери дастгоҳи нафасдиҳии сунъӣ қарор дорад.

Ёдрас мекунем, ки ахири ҳафтаи гузашта Наҷмиддин Қаюмов, ки тирамоҳи соли гузашта аз шаҳри Хуҷанд ба хизмати ҳарбӣ дар сафи Қувваҳои Мусаллаҳи Тоҷикистон даъват шуда буд, бо захми тир бистарӣ гардид. Ӯ нахуст дар госпитали ҳарбии пойтахт ва сипас дар Маркази миллии тиббӣ бо захми тир дар сараш бистарӣ шуд.