Дар рейтинги глобалии навшудаи иқтидори низомӣ ( Global Firepower – 2016 ), ки тибқи маълумоти Раёсати марказии иктишофӣ (ЦРУ)-и ИМА аз сарчашмаҳои кушод таҳия гардидааст, миёни 126 кишвари ҷаҳон артиши Тоҷикистон зинаи 112-ум ( рейтинги соли гузашта - зинаи 116-ум)-ро ишғол мекунад.

Дар рейтинг Global Firepower (GFP) қайд мекунад, ки тайи солҳои ахир дар артиши Тоҷикистон тагйироти назаррасе сурат нагирифтааст. Артиши Тоҷикистон дорои 37 танк, 46 мошинҳои зиреҳпӯш, 25 ҳавопаймои низомӣ, 4 ҳавопаймо барои тамрин, 20 чархболи таъиноти умумӣ ва 6 чархболи зарбазан мебошад.

Таҳиягарони рейтинг буҷети артиши Тоҷикистонро 75 млн. доллари ИМА ва шумори хизматчиёни артишро 6 ҳазор нафар арзёбӣ кардаанд.

Мувофиқи рейтинги нав, аз рӯи иқтидор артиши Тоҷикистон заифтарин дар паҳнои пасошӯравӣ аст. Миёни кишварҳои собиқи иттиҳоди Шӯравӣ Русия пешсаф аст, ки баъди артиши ИМА зинаи дуюмро ишғол мекунад.

Аз рӯи иқтидор артиши Украина дар зинаи - 30-юм, Ӯзбекистон - 48, Беларус - 49, Қазоқистон - 53, Озарбойҷон - 60, Гурҷистон - 80, Туркманистон - 86, Арманистон - 94, Литва - 97, Латвия - 103, Эстония - 109 ва Қирғизистон дар мақоми 110-ум ҷойгир шудаанд.

Дар қатори артишҳои ИМА ва Русия Қувваҳои мусаллаҳи Чин низ ба сегонаи пешсафон шомил аст. Дар даҳгонаи беҳтарин артишҳои ҷаҳон аз рӯи иқтидор айни замон Қувваҳои Мусаллаҳи Ҳиндустон, Фаронса, Британияи Кабир, Ҷопон, Туркия, Олмон ва Италия низ қарор доранд.

Артишҳои заифтарини ҷаҳон Қувваҳои мусаллаҳи Ҷумҳурии Африқои Ҷанубӣ (зинаи 126-ум), Сомали, Намибия ва Панама дониста шудаанд.