Раёсати Бозрасии давлатии автомобилии ВКД Тоҷикистон аз 31-уми август то 10-уми сентябр дар қаламрави ҷумҳурӣ амалиёти «Бачаҳо»-ро мегузаронад.

Бино ба иттилои маркази матбуоти ВКД Тоҷикистон, амалиёт бо мақсади таъмини бехатарии ҳаракат дар роҳ ва пешгирии садамаҳои роҳу нақлиётӣ бо иштироки кӯдакону наврасон роҳандозӣ мешавад.

Дар доираи амалиёт кормандони БДА дар минтақаҳо аз мактабҳои таҳсилоти умумии кишвар ва сардорони Раёсатҳои БДА ВКД аз мактабҳои олии шаҳри Душанбе боздид намуда, бо хонандагону донишҷӯён дар бораи риояи қоидаҳои бехатарии ҳаракат дар роҳ вохӯриву суҳбатҳо баргузор мекунанд.

Раёсати БДА аз тамоми шаҳрвандони ҷумҳурӣ даъват кардаааст, ки дар ташкил ва гузаронидани чорабинии мазкур фаъол буда, талаботи қоидаҳои ҳаракат дар роҳро риоя намоянд ва ҳаёти худу дигаронро зери хатар нагузоранд.

Тибқи маълумоти ВКД, соли гузашта дар ҷумҳурӣ 1 ҳазору 285 ҳодисаҳои садамаи нақлиёт ба қайд гирифа шуда, бар асари онҳо 396 нафар ҳалок ва 1 ҳазору 357 нафар ҷароҳатҳои гуногун бардоштаанд.

Маводи мо бо суроғаҳои news.tj ё asiaplustj.info тариқи браузери Opera (ба кор даровардани VPN лозим аст) қобили дарёфт аст. Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.