Бонки миллии Тоҷикистон (БМТ) бори дигар шаҳрвандонро аз фаъолшавии қаллобон, ки платформаҳои интернетиро барои фиреб истифода мекунанд, огоҳ мекунад. Ҳолатҳои қаллобӣ бахусус дар шабакаҳои иҷтимоии Telegram ва WhatsApp ба мушоҳида мерасанд. Дар ин бора шуъбаи матбуоти Бонки миллии ҷумҳурӣ хабар медиҳад.

“Қаллобон ба шумо занг зада, метавонанд худро корманди ташкилоти тиҷоратӣ муррифӣ намоянд, дар гирифтани қарз ё дарёфти даромади осон ваъдаи кумак диҳанд, бо баҳонаи ба итмом расидани муҳлати корт ё гӯё вуҷуд доштани кӯшиши тасарруфи пул аз корти бонкиатон рақами корт, калимаи калидӣ, CVV рамзро пурсанд, ё ин ки тавассути мессенҷер ба шумо файли шубҳанок ирсол намоянд”, - гуфта мешавад дар хабар.

Дар Бонки миллӣ боисрор тавсия медиҳанд, ки  дар чунин ҳолатҳо ҳушёру боэҳтиёт буда, ҳеҷ гоҳ тариқи телефон ё интернет маълумоти бонкии худро ба каси дигар надиҳанд.

Таъкид мешавад, ки бонк ё ташкилоти қарзии молиявӣ маблағҳоро тавассути Фейсбук, Телеграмм, Инстаграм ё дигар шабакаҳои маҷозӣ пешниҳод намекунад.

Илова бар ин, зикр мекунанд дар БМТ, Бонк ба шахсони воқеӣ шаҳодатнома ё иҷозатнома (литсензия) барои гузаронидани амалиётҳоро намедиҳад.

Аз шаҳрвандон даъват мешавад, ки барои фирефтаи қаллобон нагардидан ба таблиғҳои бардурӯғ (фейкӣ) бовар накунанд, эҳтиёткор бошанд ва аз гузаронидани маблағ ба кортҳое, ки аз ҷониби чунин ашхос пешниҳод мегардад, худдорӣ намоянд.

Ин аввалин огоҳии Бонки миллии Тоҷикистон нест. Моҳи декабри соли 2024 БМТ таваҷҷуҳи аҳолиро ба эълонҳое, ки аз ҷониби қаллобон аз номи БМТ тариқи шабакаҳои иҷтимоӣ нашр мешуданд, ҷалб карда буд. Дар изҳорот зикр шуда буд, ки ин эълонҳо ба Бонки миллӣ ҳеҷ муносибате надоранд.

Гуфта мешуд, қаллобон барои фиреби шаҳрвандон аз номи ширкат ва шахсиятҳои маъруф, аз ҷумла ширкатҳои «Toyota», «Beko», бонкҳои «Эсхата», «Амонатбонк», «Душанбе Сити Банк», инчунин номи президент ва шаҳрдори Душанбе истифода мебаранд.

Ҳамчунин чанде пеш сомонаи бардурӯғе ошкор шуд, ки аз номи гурӯҳи расонаҳои “Азия-Плюс” маълумоти бардурӯғ ва хидматрасониҳои шубҳанокро пешниҳод мекард. Дар хабари ин сомонаи ҷаълӣ (фейкӣ) зикр мешуд, ки гӯиё Бонки миллии Тоҷикистон барои мусоҳиба бо блогери маъруф Ёдгор Исломбеков аз болои ҳунарманд Таҳмна Раҷабова ба додгоҳ шикоят мекунад.

Дар Telegram, Facebook ва Instagram бо мо бимонед.