Фестивали дуюми автомобилҳои коллексионӣ дар шаҳри Душанбе рӯзи 21-уми сентябр гузаронида мешавад.

Бино ба иттилои хадамоти матбуоти мақомоти шаҳрдории пойтахт, дар қарори дар ин робита ба имзорасидаи раиси пойтахт Маҳмадсаид Убайдуллоев зикр мегардад, ки бо дастгирии ташаббуси дӯстдорон ва соҳибмулкони ретро-автомобилҳои шаҳри Душанбе, 21 сентябри соли равон аз соати 9:00 то соати 12:00 дар шаҳри Душанбе дуюмин фестивали автомобилҳои коллексионӣ дар майдончаи назди роҳи ҳалқавии буриши кӯчаи Карамов ва хиёбони Ҳофизи Шерозӣ баргузор ва паради автомобилҳои коллексионӣ дар самти кӯчаи Карамов, хиёбони Рӯдакӣ, кӯчаҳои С.Айнӣ ва А.Дониш гузаронида мешавад.

«Раёсати Вазорати корҳои дохилии Тоҷикистон дар шаҳри Душанбе бехатарии ҳаракати воситаҳои нақлиётро ҳангоми гузаронидани фестивал ва паради автомобилҳои коллексионӣ таъмин намояд», - гуфта мешавад дар қарор.

Ёдрас мекунем, ки 21-уми апрел дар Душанбе фестивали нахустини автомобилҳои қадима «Авто ретро Душанбе» доир гардида буд. Созмондиҳандагони фестивал изҳор намуда буданд, ки аз ин чорабинӣ ҳудуди 10 ҳазор нафар боздид намуда, шумори умумии автомбил ва дучарха (мотосикл)-ҳо беш аз 100 ададро ташкил дода буд.