Рӯзи 23-юми сентябри соли равон гузориши нави Созмони байнулмилалии меҳнат (СБМ) дар бораи арзёбии ахири шумори кӯдакони коргар дар саросари ҷаҳон пешниҳод мегардад.

Бино ба иттилои Маркази иттилооти СММ, дар гузориш таҳти унвони «Арзёбии пешравӣ дар мубориза бо меҳнати кӯдакон – маълумоти глобалии арзёбӣ ва тамоилҳо дар солҳои 2000-2012» маълумоти тозатарин дар бораи паҳн гардидани меҳнати кӯдакон ва натиҷаҳои кӯшишҳои байнулмилалӣ дар самти аз байн бурдани он дарҷ ёфтаанд.

Шурӯъ аз соли 2000-ум, СБМ сатҳи коҳиши миқёси истифодаи меҳнати кӯдаконро пайгирӣ дошта, суръати дилхоҳи ин коҳишро муайян мекунад. Дар гузориши тоза бо назардошти ҳадафҳои гузоштаи СБМ оид ба аз байн бурдани шаклҳои бадтарини истифодаи меҳнати кӯдакон то соли 2016, ҳамчунин вазъ мавриди таҳлил қарор дода шудааст.

Дар ҳамин ҳол, мувофиқи гузориши СБМ барои соли 2012, дар Тоҷикистон ҳудуди 10 ҳазор нафар кӯдакон дар кӯчаву хиёбонҳо, аслан дар шаҳрҳо машғули коранд. Беш аз 80%-и кӯдакони машғули кор дар кӯчаву хиёбонҳо дар шаҳри Душанбе мутамарказанд. Имрӯз дар Тоҷикистион танҳо 7%-и ҳосили пахта бо истифода аз меҳнати кӯдакон ҷамъоварӣ карда мешавад.