Омодагӣ барои барӯйхатгирии навбатии аҳолии Тоҷикистон дар соли 2020 соли равон шурӯъ мешавад.

Бино ба иттилои хадамоти матбуоти Агентии омори назди президенти ҶТ, ин масъала дар вохӯрии намояндагони вазорату идораҳои ҷумҳурӣ бо донорҳо дар Агентӣ баррасӣ шудааст, ки дар он аз ҷумла намояндагони ташкилотҳои байналмилалӣ: Бонки умумиҷаҳонӣ, Ташкилоти озуқа ва кишоварзии СММ, Хазинаи нуфуси СММ, Ташкилоти байналхалқии меҳнат, Агентии Туркия оид ба ҳамкориҳои байналмилалӣ, Хазинаи кудаконии СММ, Фонди ОғоХон, Агентии Ҷопон оид ба рушд ва ҳамкориҳо, Барномаи рушди СММ, Иттиҳоди Аврупо, ва инчунин вазорату идораҳо иштирок доштаанд.

Гуфта мешавад, дар ин вохӯрӣ қайд шудааст, ки шурӯъ аз соли равон барои ташаккули заминаи меъёриву ҳуқуқӣ, ташкили сафарҳои хизматӣ бо мақсади шиносоӣ бо саволномаҳои намунавӣ барои баруйхатгирии навбатӣ ва ҷорӣ намудани Низоми иттилоотии ҷуғрофӣ барои харитакунонии баруйхатгирӣ кумаки техникӣ зарур аст.

Ҳамчунин таъкид шудааст, ки нисбатан дар сатҳи паст қарор доштани истифодаи технологияҳои иттилоотӣ, паҳн намудани таҷриба ва пешниҳоди иттилоотро мушкил мегардонад ва бо ин мақсад таъсиси шабакаи корпоративии байни мақомоти омори ноҳияҳо ва вилоятҳо зарур аст.

Ёдрас мекунем, ки маъракаи барӯйхатгирии аҳолии охирин дар Тоҷикистон соли 2010 гузаронида шуд. Ба ҳолати аввали октябри соли 2010 дар ҷумҳурӣ 7 млн. 565 ҳазор нафар иқомат доштанд, ки дар муқоиса бо соли 2000-ум 1 млн. 438 ҳазор нафар зиёдтар аст.