Шурӯъ аз имрӯз дар Тоҷикистон ҳаҷми маошу нафақа ва кумакпуливу стипендияҳо зиёд карда мешаванд. Президенти Тоҷикистон Эмомалӣ Раҳмон аввали моҳи июн фармони дахлдорро дар ин хусус ба имзо расонид.

Тибқи Фармони мазкур аз 1 июли соли 2016 ҳадди ақали музди меҳнат дар тамоми соҳаҳои иқтисодиёти мамлакат 60 фоиз зиёд карда шуда, андозаи он 400 сомонӣ дар як моҳ муқаррар карда шудааст.

Аз моҳи июли соли 2016 ҳаҷми маоши хизматчиёни давлатӣ, кормандони сохторҳои қудратӣ ба андозаи 15%, кормандони соҳаи маорифу илм ва фарҳангу варзиш ба миқдори 20%, кормандони бахши иҷтимоӣ - 25%, нафақа - 20%, стипендияҳо - 30% боло бурда шуда, маоши ҳадди ақал аз 250 сомонии ҳозира то 400 сомонӣ (60%) меафзояд.

Барои амалисозии нақшаҳои зикргардида дар як сол 1 млрд. 323 млн. сомонӣ маблағ зарур аст.