Раиси Кумитаи забон ва истилоҳоти назди ҳукумати Тоҷикистон Гавҳар Шарофзода журналистонро огоҳ кард, ки минбаъд барои риоя накардани меъёрҳои истифодаи забони давлатӣ ҷарима хоҳанд супурд.

Зимни нишасти хабарӣ ӯ дар ин робита изҳор намуд, ки дар назди кумита комиссияи махсус таъсис дода шудааст, ки мунтазам нашри мавод дар матбуоти чопиву электронӣ ва радиову телевизионро аз нигоҳи риояи меъёрҳои забон пайгирӣ мекунад ва дар сурати ошкор шудани қонуншиканиҳо, рӯзноманигорон ҷаримабандӣ мешаванд.

Раиси Кумита аз он нигаронӣ изҳор кард, ки журналистони тоҷик ошкоро ба забони модариашон беэҳтиромӣ зоҳир намуда, дар маводи худ аз калимаҳои нофаҳмои хориҷӣ истифода мекунанд ва ин ҳам дар ҳолест, ки дар забони тоҷикӣ синонимҳои ин калимаҳои барои ҳама фаҳмо ба таври кофӣ мавҷуданд.

Номбурда ҳамчунин таъкид дошт, ки ояндаи наздик намояндагони Кумита ҳатман бо журналистон вохӯрда, масъалаи истифодаи дурусти забони давлатиро муфассалтар баррасӣ мекунанд.