Чанд рӯзи наздик дар ҷумҳурӣ вазиши шамоли сахт ва тӯфони чангу ғубор дар назар аст.

Кумитаи ҳолатҳои фавқулода аз аҳолӣ дархост мекунад, ки аз сафар ба минтақаҳои кӯҳистон худдорӣ варзида, ба шахсони бемори дилу раг ва фишори хуну роҳҳои нафас бештар таваҷҷуҳ зоҳир шавад.

Бино ба маълумоти обуҳавошиносон, рӯзҳои 3-4 ноябр дар як қатор ноҳияҳои вилояти Суғд поинравии ҳарорат пешбинӣ шуда, обуҳаво рӯзона 8-10 дараҷа гарм мешавад.

Бино ба маълумости дафтари матбуоти Кумитаи ҳолатҳои фавқулода, ҳамчунин дар вилоятҳои Суғду Хатлон ва чанде аз ноҳияҳои тобеи марказ шиддатгирии суръати вазиши шамол то 12-17 м/с ва тӯфони чангу ғубор дар назар аст.

Кумита аз аҳолӣ хоҳиш мекунад, ки ҳангоми кор дар саҳро эҳтиёткор буда, дар минтақаи кӯҳистон ин рӯзҳо аз ҷамъоварии ҳезум ва шикор худдорӣ кунанд.

Ҳамчунин ба ронандагон вава дӯстдорони кӯҳнавардӣ хотиррасон мешавад, ки ҳангоми ҳаракат дар мавзеи кӯҳистон риояи қатъии техникаи бехатарӣ, ҳамчунин риояи масофаи муқарраршуда зарур аст, зеро хавфи сангфароӣ вуҷуд дорад.

Хабарҳои моро дар Telegram пайгирӣ намоед, ба шабакаи мо бо суроғаи  https://t.me/asiaplus  ҳамроҳ шавед.