Ҳукумати Тоҷикистон барои табобати шоири мардумӣ Бозор Собир, ки айни замон дар шуъбаи эҳёгарии бемористони шаҳри Сиэтл (ИМА) бистарӣ аст, маблағ ҷудо намуд.

Тавре ба «Азия-Плюс» Низом Қосим, раиси Иттифоқи нависандагони Тоҷикистон дар ин робита хабар дод, маблағи ҷудошуда (миқдораш маълум нест, - идора) аллакай ба ҳамсари шоир Гулчеҳра дода шудааст.

«Вазъи саломатии Бозор Собир ноустувор аст: баъзан муваққатан рӯ ба беҳбудӣ оварда, сипас боз бад мешавад», - иброз дошт ӯ. - Ман огаҳам, ки президент аз вазъи солимии шоир нигарон буда, бо қарори ӯ ҳукумат барои муолиҷаи Бозор Собир маблағи кофӣ ҷудо намуд».

Номбурда ҳамчунин қайд кард, ки наздики ду ҳафта аст, ки намояндаи сафорати Тоҷикистон дар Вашингтон ва намояндаи доимии Тоҷикистон дар СММ Маҳмадамин Маҳмадаминов дар бемористон паҳлӯи Бозор Собир қарор доранд, ки дар табобати шоир ба наздикони ӯ кумак мекунанд.

«Эмомалӣ Раҳмон дастур дод, ки барои муолиҷаи шоир табибони беҳтарин ҷалб карда шаванд, - гуфт Низом Қосим. - Ташхисҳои Бозор Собир ҷиҳати муоина ва таҳлил ба Маскав ва Олмон фиристода шуданд».

Ёдрас мекунем, ки Президенти Тоҷикистон Эмомалӣ Раҳмон аз бемории шоир огаҳ шуда, ба роҳбарияти Вазорати корҳои хориҷӣ, Сафорати Тоҷикистон дар ИМА, Намояндагии ҶТ дар СММ ва дигар мақомоти марбута супориши қатъӣ дод, ки ба аёдати ӯ рафта, барои таъмини табобати муттасил, ҳалли тамоми мушкилоти мавҷуда, кӯмаку дастгирӣ ва баҳри ҳарчӣ зудтар ба Ватан омадани шоир мусоидат намоянд.

Хабарҳои моро дар Telegram пайгирӣ намоед, ба шабакаи мо бо суроғаи  https://t.me/asiaplus  ҳамроҳ шавед.