"Тоҷикистон имрӯз бе коронавирус аст", - изҳорот дод Эмомалӣ Раҳмон, имрӯз ҳангоми ироаи паём ба Маҷлиси Олии Ҷумҳурии Тоҷикистон. Президенти Тоҷикистон гуфт, ки аз оғози моҳи январи соли 2021 дар Тоҷикистон дигар мавридҳои сироят шудан ба коронавирус сабти ном нашудааст.

Аммо Эмомалӣ Раҳмон гуфт, ки ин маънои онро надорад, ки мо қоидаҳои беҳдоштии инфиродиву ҷамъиятиро сарфи назар кунем. Ӯ гуфт, "Худоро шукр мо ба вазъе, ки дар дигар кишварҳо, аз ҷумла кишварҳои аврупоӣ рух дод, дучор нашудем".

Эмомалӣ Раҳмон ишора кард, мо дидем, ки баъзе маърака ва тӯйҳо сабаби сироятёбии вазнин шуд. Аммо раисҷумҳур нагуфт, ки ин  маъракаву тӯйҳо дар куҷо буданд ва чӣ теъдод мардум дар ин тӯйҳо сироят шудаанд.

Раисҷумҳури Тоҷикистон ба боз шудани дари масҷидҳо ишора кард ва гуфт, ки агар масҷидҳое, ки қоидаҳои беҳдоштиро риоя намекунанд, дари онҳо баста шаванд. Президенти Тоҷикистон мардуми кишварро ба эҳтиёткории ҷиддӣ даъват кард.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.