Беш аз 20 ширкати сайёҳии ҷумҳурӣ Тоҷикистонро дар Намоишгоҳи байнулмилалии ITB Berlin 2023 намояндагӣ мекунанд.

Тавре ки Кумитаи рушди сайёҳии ҷумҳурӣ хабар медиҳад, дар масоҳати 20 метри мураббаъ гӯшаи сайёҳии Тоҷикистон таҳти унвони «Тоҷикистон —сарзамини сайёҳӣ» бо тарҳу усули миллӣ ва муосир ба тамошои дӯстдорони сайру саёҳат гузошта мешавад.

“Беш аз 20 ширкати сайёҳии ватанӣ бартариятҳои рақобатнокии Тоҷикистонро дар самтҳои сайёҳии экологӣ, табобатию солимгардонӣ, варзишию кӯҳнавардӣ, шикор, фарҳанги нодир ва тамаддуни қадимии миллати тоҷикро ҳамчун маҳсулоти миллии сайёҳӣ муаррифӣ менамоянд”, - омадааст дар хабар.

Гуфта мешавад, иштироки намояндагони Тоҷикистон дар ин намоишгоҳ ҳамчун барои таблиғи захираҳои сайёҳии мамлакат хеле муфид буда, имкон медиҳад, ки байни ширкатҳои сайёҳии ватанию хориҷӣ қарордодҳои ҳамкорӣ ба имзо расанд ва ҷалби сайёҳони хориҷӣ аз қораи Аврупою Осиё вусъат дода шавад.

Қобили зикр аст, ки Намоишгоҳи байнулмилалии ITB Berlin 2023 аз 7 то 9 март дар шаҳри Берлин (Олмон) баргузор мешавад.

Намоишгоҳи ITB Berlin таърихи тӯлонӣ дошта, аз соли 1966 инҷониб доир мегардад. Тӯли ин давра он ба яке аз рӯйдодҳои муҳими ҷаҳон дар соҳаи тиҷорати сайёҳӣ табдил ёфт. Соли 2023 намоишгоҳ ба шакли нави кор мегузарад: дар он чорабиниҳое баргузор хоҳанд шуд, ки танҳо барои тамошогарони мутахассис, харидорон ва ВАО пешкаш мешаванд.

Дар Telegram, Facebook, Instagram, OK ва ВК бо мо бимонед.