Эмомалӣ Раҳмон, раисҷумҳури Тоҷикистон дар пайи суқути як ҳавопаймо дар Куриёи Ҷанубӣ, ки бар асари он 179 нафар ҷон доданд, ба Чҳве Сан Мок, иҷрокунандаи вазифаи президенти ин кишвар таслият баён кард.

Ба навиштаи хадамоти матуботи раисҷумҳури Тоҷикистон, Эмомалӣ Раҳмон имрӯз, 30-юми декабр гуфтааст, ки ин ҳодиса ӯро сахт андӯҳгин кардааст.

Вай ба иҷрокунандаи вазифаи раисҷумҳури Корея ва пайвандону наздикони ҷонбохтагон таъзия баён карда, барои осебдидагон шифои комил хостааст.

Бояд гуфт, ки субҳи 29-уми декабр як ҳавопаймои мусофирбари ширкати “Jeju air”-и Куриёи Ҷанубӣ зимни бозгашт аз шаҳри Бангкоки Тайланд ба садама дучор шуд.

Дар ҳавопаймо 175 мусофир ва 6 сарнишин қарор доштанд, ки 179 нафар ҷон бохтаанд. Танҳо ду нафар аз хидматрасонҳои ҳавопаймои “Boeing 737-800” зинда мондаанд ва ҳоло дар бемористонанд.

Дар наворҳое, ки нашр шудаанд, дида мешавад ҳавопаймои ширкати куриёӣ ҳангоми фуруд аз хатти парвоз берун шуда, ба девор бармехӯрад.

Сабабҳои ҳодиса таҳқиқ мешаванд, вале ҳоло бархурди паррандаҳо ба чархҳои ҳавопаймо ва аз кор мондани онҳо яке аз омилҳои эҳтимолии сонеҳа гуфта мешавад.

Ба навиштаи “Yonhap”, 173 мусофир аҳли Куриёи Ҷанубӣ ва ду нафари дигар аз Тайланд будаанд.

Давлати Куриёи Ҷанубӣ дар робита ба ин садама 7 рӯз, аз 29-уми декабри соли 2024 то 4-уми январи соли 2025 мотами миллӣ эълон кардааст.

Ёдрас мешавем, ки дар чанд рӯзи охир ин дуввумин ҳодисаи суқути ҳавопаймо бо марги даҳҳо нафар аст. 

Қаблан, ҳавопаймои масофирбари ширкати “Azerbaijan Airlines"-и Озарбойҷон, ки аз Боку ба шаҳри Грознийи Чеченистон парвоз мекард, дар наздикии фурудгоҳи минтақаи Оқтауи ҷануби Қазоқистон суқут кард. Аз 67 мусофири дохили ҳавопаймо, 38 нафар ҳалок шудаву 29 нафар наҷот ёфтанд. Ду зодаи Тоҷикистон ҳам дар ин ҳавопаймо буданд, ки яке ҷон ба сломат бурда дуввумӣ, ҳалок шудааст.

Дар Telegram, Facebook ва Instagram бо мо бимонед.