Ҳамасола феҳристи хушбахттарин кишварҳои ҷаҳон интишор мешавад, ки аз ҷониби Созмони миллали муттаҳид (СММ) таҳия мегардад.
Коршиносон сатҳи хушбахтиро аз рӯи нишондиҳандаҳое чун ММД ба ҳар сари аҳолӣ, давомнокии умр, мавҷудияти фасод дар кишвар ва арзёбии қаноатмандӣ аз худ муайян мекунанд.
СММ имсол Финляндияро хушбахттарин кишвар эътироф кард ва ин бори ҳафтум аст. Инчунин дар ТОП-3 Дания ва Исландия ҷойгир шудаанд. Афғонистон бадбахттарин кишвар дониста шуд.
Як далели ҷолиб ин аст, ки бори аввал аз замони таъсиси ин рейтинг на ИМА ва на Олмон ба 20 кишвари хушбахттарин шомил нашуданд.
Тоҷикистон чӣ?
Тоҷикистон дар байни 143 кишвар зинаи 89-умро соҳиб шуд. Ин поинтар зина миёни кишварҳои дигари Осиёи Марказӣ – Ӯзбакистон, Қазоқистон ва Қирғизистон аст, ки мутаносибан дар ҷойҳои 47, 49 ва 75-ум қарор доранд.
Аммо дар ҳамин ҳол, сокинони Тоҷикистон худро хушбахттар аз сокинони Туркия ва Гурҷистон эҳсос мекунанд.
Соли гузашта Тоҷикистон дар ҷои 83-юм ва як сол пеш 78-ум қарор дошт. Яъне тайи ду соли ахир 10 зина поён рафтааст.
Ҳисобот инчунин бори аввал сатҳи хушбахтиро аз рӯи синну сол таҳлил мекунад. Пажӯҳишгарон муайян кардаанд, ки дар саросари ҷаҳон, аз ҷумла дар Тоҷикистон, дар баробари пир шудани одамон сатҳи хушбахтии миёна тадриҷан коҳиш меёбад.
Синну соли хушбахттарин афрод аз 15 то 24-сола мебошанд.
Руcский