Муроҷиатномаи ҷомеаи шаҳрвандии Тоҷикистон вобаста ҳаводиси ВМКБ ба раисҷумҳур Эмомалӣ Раҳмон имрӯз расонаӣ шуд.

Дар муроҷиатнома муроҷиаткунандагон навиштаанд, ки аз фавти 3 нафар шаҳрванди мулкӣ ва захмӣ шудани зиёда аз 16 нафар изҳори нигаронӣ мекунанд. 

Намояндаҳои ҷомеаи шаҳрвандӣ аз мақомоти кишвар даъват кардаанд, ки дар ӯҳдадориҳои худ устувор бошанд ва барои ҳалли мусолиматомези низоъ ва пешгирии нақзи ҳуқуқи инсон дар оянда тамоми талошҳои заруриро ба харҷ диҳанд.

"Мо аз таъсиси гурӯҳи махсуси корӣ бо иштироки тамоми ҷонибҳои манфиатдор оид ба таҳқиқи марги Зиёбеков Гулбидин ва дигарон, инчунин кафолати тафтишоти ошкоро истиқбол мекунем" - омадааст дар муроҷиатнома.

Дар идома намояндагони ҷомеаи шаҳрвандӣ аз Эмомалӣ Раҳмон даъват карданд:

1. Истифодаи қувва ва яроқи оташфишон муқобили аҳолии шаҳри Хоруғ ва дар умум ВМКБ фавран қатъ карда шавад. 

2. Вобаста ба ҳолатҳои фавти шаҳрвандӣ ва захмгириҳо, аз ҷумла, дар боби асоснокӣ ва зарурати истифодаи қувваю яроқи оташфишон аз ҷониби мақомоти ҳифзи ҳуқуқ 25-уми ноябри соли 2021 ҳангоми боздошти Зиёбеков ва дар давраи гирдиҳамоиҳои 25-27-уми ноябри соли 2021 дар шаҳри Хоруғ тафтишоти саривақтиву самараноки ҳамаҷониба гузаронида шавад.

3. Шахсони гунаҳгор дар фавти сокинони мулкӣ дар шаҳри Хоруғ ба ҷавобгарӣ ҷалб карда шаванд. 

4. Оид ба ҷараёни тафтишоти гузаронида ва чораҳои андешидашуда аҳолӣ саривақт огоҳ карда шавад.  

Зери муроҷиати ҷомеаи шаҳрвандӣ 9 ташкилоти ҷамъиятӣ имзо гузоштаанд: "Дафтари озодиҳои шаҳрвандӣ", "Дунёи ҳуқуқ", "Ташаббуси ҳуқуқӣ", "Солимии ҷамъият ва ҳуқуқи инсон", "Нотабене", "Ҳуқуқ ва Беҳбудӣ", "Маркази ҳуқуқи инсон", "Маркази мустақили ҳифзи ҳуқуқи инсон", "Анҷумани ҳуқуқшиносони Помир".

Ёдовар мешавем, ки эътироз дар Хоруғ рӯзи 25-уми ноябр баъди фавти як сокини деҳаи Тавдеми ноҳияи Роштақалъа Гулбиддин Зиёбеов шурӯъ шуда то имрӯз идома дошт. Мақомоти интизомӣ мегӯянд, Зиёбеков ҳангоми боздошт дар хонааш аз туфангчаи "Макаров" ба кормандони мақомот тир кушод ва ҳангоми тири ҷавобӣ захмӣ гашт. Бархилофи хабари расмӣ, шоҳидон мегӯянд, Зиёбеков қасдан кушта шудааст.

Мақомот гузарондани амалиёт барои боздошти Зиёбековро тасдиқ карданд ва гуфтанд, ӯ мувофиқи се моддаи Кодекси ҷиноятии ҶТ дар кофтукови расмӣ қарор дошт.

Зиёбековро бо он гунаҳкор мекарданд, ки ӯ ҳамроҳ бо ҳамдастаҳояш (ки аз онҳо дар хабарҳои расмӣ ном бурда нашудааст) 1 феврали соли 2020 ёвари додситони ноҳияи Роштқалъаро гаравгон гирифта, муддати 8 соат мавриди латукӯб ва шиканҷа қарор дода буданд. Ба гуфтаи сокинон, сабаби ҷанҷоли Зиёбеков бо ёвари прокурор, хоҳиши муомиомилаи маҳрамонаи дуюмӣ бо яке аз наздикони ӯ аст.

Имрӯз, 28-уми ноябр, намояндаи тазоҳуротгарон ва ҳокимияти вилоят бори чорум сари музокирот нишастанд. Мувофиқи иттилои манбаъҳо ҷонибҳо ба мувофиқа расиданд ва тазоҳуроткунандагон пароканда мешаванд.