Намоишномаи “Табиби паррон” бори панҷум ҷоизаи ҷашнвораи байналмилалии “Оини суннатии театрҳои миллӣ”-ро дар Эрон ба даст овард. Дар ин бора Сӯҳроб Шехов, саркоргардони Театри давлатии мусиқӣ-мазҳакавии ба номи Камолӣ Хуҷандӣ ба “Азия-Плюс” иттилоъ дод.
Ин ҷашнвора аз 29-уми сентябр то 3-юми октябр бо ҳузури меҳмонон аз кишварҳои хориҷа дар шаҳри Гургони вилояти Гулистони Эрон баргузор шуд.
Тоҷикистонро дар ҷашнвора бо намишномаи “Табиби паррон” гурӯҳи эҷодии Театри давлатии мусиқӣ-мазҳакавии Хуҷанд намояндагӣ карданд. Ба қавли Сӯҳроб Шехов, ин намоишнома дар Эрон бисёр гарм истиқбол шуд.
Сӯҳроб Шехов гуфт, дар ин ҷашнвора 24 театр бо намоишномаҳои гуногун ширкат варзиданд, ки аз он се театри кишварҳои хориҷӣ буд: Тоҷикистон, Арманистон ва Чин.
Маросими супурдани ҷоиза дирӯз, 5-уми октябр баргузор шуд.
“Намоишномаи “Табиби паррон” бо ҷоизаи махссуси ҷашнвораи “Оини суннатии театрҳои миллӣ” дар Эрон қадрдонӣ шуд. Ба ҳунармандон низ диплому сипоснома тақдим гашт”, - гуфт ҳамсӯҳбати мо.
Ба таъкиди Шехов, намоишномаи “Табиби паррон” аз рӯи асари драманависи фаронсавӣ Жан Батист Молйер таҳия шуда, ҳунармандони тоҷик онро дар қолаби анъанаҳои миллӣ рӯйи саҳна гузоштаанд.
“Аз ҷумла, номи қаҳрамонҳо, сару либоси ҳунармандон ва ҳатто саҳнаҳо бо садои доира банду баст мегардад, ки сирф тоҷикона аст”, - иброз дошт саркоргардони театр.
“Табиби паррон” рамзӣ буда, ишқи ду ҷавон ва найрангҳои як сарватмандеро, ки барои якҷо шудани онҳо монеъ мешавад, тасвир мекунад.
Қобили зикр аст, ки ин панҷумин ҷоизаи намоишномаи “Табиби паррон” аст. Аз ин пеш намоишномаи мазкур дар ҷашнвораҳои Қазон дар Русия (2019), Актаваи Қазоқистон (2019), Смоленски Русия (2022, ду ҷоиза) ва Алмаатои Қазоқистон (2022) ба ҷоиза сазовор гардида буд.
Руcский