Вазорати умури хориҷии Эрон иддаои расонаҳои амрикоӣ дар робита ба нақш доштани Эрон дар сӯйиқасд ба ҷони Доналд Трамп, раиси ҷумҳури пешин ва номзади кунунӣ ба маснади раисиҷумҳури Амрикоро рад намуд ва онро “муғризона” унвон кард.
Носир Канъонӣ, сухангӯи Вазорати умури хориҷии Эрон гуфтааст, ки кишвараш “ҳар гуна дахолат дар ҳамлаи мусаллаҳонаи охир ба Трампро рад мекунад”.
Ӯ гуфтааст, ки аз нигоҳи Эрон “Трамп ҷинояткор аст, ба хотири содир кардани дастури террори Қосим Сулаймонӣ бояд дар додгоҳ муҷозот шавад”, аммо кишвари Эрон талаб дорад, ки ба он қазия танҳо посухи ҳуқуқӣ дода шавад.
“...аммо Ҷумҳурии исломӣ ҳар навъ мудохила дар ҳамлаи охир алайҳи Трамп ва ё иддаоҳо дар мавриди қасди Эрон барои чунин иқдомеро шадидан рад мекунад ва чунин иддаоҳоро дорои аҳдоф ва ангезаҳои муғризонаи сиёсӣ медонад”, - изҳор доштааст Носир Канъонӣ.
Қаблан намояндагии Эрон дар Созмони Миллали Муттаҳид низ иддаои нақшаи Теҳрон барои қатли Трампро рад карда ва онро “бе асос ва муғризона” хонда буд.
Бояд гуфт, ки рӯзи сешанбе шабакаи телевизионии CNN бо такя ба манобеаш иддао кард, ки кишвари Эрон дар террори Доналд Трамп, раиси ҷумҳури пешини Амрико даст дорад.
Ин манбаъ ба CNN афзудааст, ки Хадамоти махфии Амрико, ки амнияти мақомоти баландпояро таъмин мекунад, аз ҳамин сабаб вазъи амниятии номзадҳои ҷумҳурихоҳро афзоиш додааст.
Аммо як намояндаи Шӯрои амнияти Амрико таъкид кардааст, ки то ба ҳол иртиботе миёни ҳамлагар ба ҷони Трамп ва гурӯҳ ё давлати хориҷие муайян нашудааст.
Ёдовар мешавем, ки рӯзи 13-уми июл дар рафти ҷамъомади пеш аз интихоботӣ дар иёлати Пенсилвания ба ҷони Доналд Трамп сӯиқасд шуд ва раиси ҷумҳури пешини Амрико дар ин ҳодиса аз гӯши росташ ҷароҳат бардошт. Дар ин ҳодиса тирандоз ва яке аз иштирокдорони гирдиҳамоӣ кушта шуданд.
Руcский