Президенти Тоҷикистон Эмомалӣ Раҳмон ба сохтмони зеристгоҳи 110 кВ «Қозидеҳ» дар ноҳияи Ишкошим ва ба сохтмони 42 километр хати интиқоли барқи 110 кВ дар ноҳияи Рӯшон ифтитоҳ бахшид.

Дар маросими ифтитоҳ Раймундас Кароблис - сафири Иттиҳоди Аврупо дар Тоҷикистон ва Қозидавлат Қоимдодов - намояндаи доимии Шабакаи рушди Оғохон дар Тоҷикистон ширкат доштанд.

Ин зерсохтори муҳим тавассути шарикии Иттиҳоди Аврупо, Бунёди Оғохон ва Ширкати «Помир Энерҷӣ» дар чаҳорчӯби барномаи «Барқикунонии деҳот» бунёд мешавад.

Тибқи стратегияи миллии Тоҷикистон оид ба афзоиши содироти нерӯи барқ, лоиҳаи мазкур шабакаи минтақавии ВМКБ-ро такмил дода, иқтидори содиротии онро ба навоҳии наздимарзии Афғонистон афзоиш медиҳад.

Дар давоми ду даҳсолаи охир Ширкати «Помир Энерҷӣ» бо дастгирии Ҳукумати Тоҷикистон ва шарикони рушд ба инфрасохтори муосир ва устувор сармоягузории назаррасро барои таъмини барқи боэътимод ва хушсифат дар тамоми минтақа ҷалб намудааст.

Дар ҳоли ҳозир танҳо қитъаи охирин бо 42 км дарозӣ дар минтақаи Рӯшон дар иқтидори 35 кВ дар тамоми масири Ванҷ – Хоруғ боқӣ мондааст.

Хатти нави интиқоли барқи 110 кВ, ки аз сутунҳои пӯлодӣ сохта мешавад, интиқоли самараноки барқи тозаро ба шабакаи миллӣ ва аз шабакаи миллӣ таъмин мекунад ва содироти нерӯи барқро ба манотиқи марзии Афғонистон осон мекунад.

Гузашта аз ин, зеристгоҳи ҷадиди 110 кВ дар деҳаи Қозидеҳи ноҳияи Ишкошим имкон медиҳад, ки шабакаи нави интиқоли барқи 63-километраи Хоруғ-Қозидеҳ ба тавоноии 110 кВ гузарад ва ба ин васила сифат ва эътимоднокии нерӯи барқ барои сокинони ноҳияи Ишкошим ва навоҳии наздимарзии Афғонистон беҳтар шавад.

«Имрӯз мо марҳалаи таърихии таъсиси шабакаи боз ҳам устувор ва боэътимоди барқро дар ВМКБ ҷашн мегирем», - гуфт Далер Ҷумъа, вазири энергетика ва захираҳои оби ҷумҳурӣ.

Ӯ афзуд, ки «инфрасохторе, ки имрӯз шурӯъ мешавад, ба таъмини нерӯи барқ ​​ва рушди иқтисодии минтақа таъсири амиқ ва доимӣ хоҳад дошт. Ин дастовард на танҳо дастрасии боэътимоди нерӯи барқро барои мардум фароҳам меорад, балки барои сармоягузорӣ, рушд ва беҳтар шудани сифати зиндагӣ барои ҳамаи сокинони ин минтақаи зебои Тоҷикистон имконият фароҳам меорад».

Дар ВМКБ Иттиҳодияи Аврупо ҳамчунин сохтмони нерӯгоҳи «Себзор» ва зеристгоҳи 110 кВ дар ноҳияи Рӯшонро, ки бояд соли 2025 ба анҷом расад, маблағгузорӣ мекунад.

Илова бар ин, Иттиҳоди Аврупо асосноккунии техникӣ-иқтисодии сохтмони нерӯгоҳи барқи обии «Чарсем»-ро бо иқтидори 14 МВт дар дарёи Ғунд, воқеъ дар болооби нерӯгоҳи барқи обии «Помир-I», маблағгузорӣ мекунад. Лоиҳаи мазкур як қадами муҳим дар самти амнияти дарозмуддати энергетикии ВМКБ мебошад, зеро он ноҳияи Мурғобро ба шабакаҳои минтақавӣ мепайвандад ва истеҳсоли нерӯи барқи тозаро дар ВМКБ ба таври назаррас афзоиш медиҳад.

Сафири Иттиҳоди Аврупо дар Тоҷикистон Раймундас Кароблис гуфт: «Ман аз кӯшишҳои муштараке, ки моро ба ин марҳалаи муҳим расониданд, самимона шодам. Ин лоиҳаҳо таҷассуми ӯҳдадории муштараки мо барои беҳтар кардани дастрасӣ ба неруи барқ ва мусоидат ба рушди устувор дар ин минтақаи муҳим мебошанд. Сармоягузорӣ ба инфрасохтори боэътимод барои устувории иқтисодӣ мусоидат мекунад ва барои мардуми Тоҷикистон имкониятҳои нав фароҳам меорад. Якҷоя мо ояндаи дурахшонтар ва бехатари энергетикиро месозем, ки на танҳо ба Тоҷикистон, балки ба тамоми минтақа манфиат меорад».

«Ифтитоҳи имрӯза як қадами муҳиме ба пеш дар талошҳои мо барои баланд бардоштани сифати зиндагии мардуми Тоҷикистон мебошад», - гуфт Қозидавлат Қоимдодов, намояндаи доимии Шабакаи рушди Оғохон дар Тоҷикистон.

Ӯ инчунин афзуд, «мо боварӣ дорем, ки ин лоиҳаи беназир барои рушди устувор муҳим аст ва ин инфрасохтор дар баланд бардоштани сифати зиндагӣ дар тамоми минтақа нақши калидӣ хоҳад дошт».

Дар Telegram, Facebook ва Instagram бо мо бимонед.