Душанбе. 11-уми август. ОИ «Азия-Плюс» - Дар ноҳияи Турсунзода бар асари беэҳтиётии ронанда роҳгузари 13-сола ба ҳалокат расид.

Аз Раёсати Бозрасии давлатии автомобилии Вазорати умури дохилии Тоҷикистон ба хабарнигори ОИ «Азия-Плюс» хабар доданд, ки дар роҳи мошингарди самти деҳаи Ленинизм ронандаи автомобили «Опел Вектра» Суматулло Сафаров аз ӯҳдаи удораи мошин набаромада, роҳгузари ноболиғ Рустам Ашӯровро пахш мекунад. Аз ҷароҳатҳои ҷисмонии бардошта ҷабрдида дар ҷои ҳодиса ба ҳалокат мерасад.

Бино ба иттилои манбаъ, ҳафтаи гузашта аксари садамаҳои нақлиётӣ бар асари бо суръати баланд рондани автомобил рух додаанд. Ҳафтаи супаришуда дар ҷумҳурӣ 41 ҳодисаи садамаи нақлиётӣ ба қайд гирфта шуд, ки бар асари он 23 нафар ба ҳалокат расида, 53 нафари дигар ҷароҳатҳои ҷисмонӣ бардоштаанд.