Душанбе. 25-уми июл. ОИ «Азия-Плюс» - Аз Вазорати корҳои дохилии Тоҷикистон иттилоъ расид, ки зимни баргузории амалиёти фаврӣ ва ҷустуҷӯӣ дар қаламрави ноҳияи Восеъи вилояти Хатлон ба гумони даст доштан дар муомилоти ғайриқонунии маводи мухаддир шаҳрванди Афғонистон Ҳабибраҳмон валади Умбегалӣ боздошт шудааст.

«Зимни кофтуков аз ӯ ба миқдори 36 кг маводи мухаддир дарёфт ва мусодира карда шуд, ки 30 килои он маводи сахттаъсири ҳероин буда, боқимонда канабис мебошанд», - изҳор дошт манбаъ.

Коршиносони тоҷик бар ин назаранд, ки ҳарчанд мақомоти ҳифзи ҳуқуқи кишвари ҳамсоя эълом доштаанд, ки аз 34 вилояти мавҷудаи кишвар дар 22-тоаш кишти кӯкнорро ба пуррагӣ нест карда бошанд ҳам, тибқи нишондоҳои нимсолаи аввал тамоили афзоиши қочоқи он мушоҳида мешавад, зеро дар манотиқи ҷануби Афғонистон кишти маводи нашъаовар хеле зиёд аст.