Абдулҳаннон Маннонов, рӯҳонии 51-солаи тоҷик, ки чанд моҳ пештар дар тӯйи бародарзодааш дар ноҳияи Кушониёни вилояти Хатлон монеи рақсу сурудхонӣ шуда буд, бо ҳукми Додгоҳи вилояти Хатлон 6 сол равонаи зиндон шудааст. Қаблан ӯ, ба “даъват ба ифротгароӣ” муттаҳам мешуд.

Дар ин бора Радиои Озодӣ хабар медиҳад ва менависад, ки “ҳукм дар охири ҳафтаи гузашта эълон шуда, додрас ӯро ба даъват ба ифротгароӣ гунаҳкор кард”.

Вакили дифои ин рӯҳонӣ, Саидҷаббор Алиев эълони ҳукмро ба Радиои Озодӣ тасдиқ карда, аммо тафсилот надодааст.

Маълум нест, Абдулҳанон Маннонов дар додгоҳ чӣ гуфтааст ва мавқеи наздиконаш чист.

Қаблан, иттилоъ дода мешуд, ки бар зидди Абдулҳаннон Маннонов барои "даъват ба ифротгароӣ” парвандаи ҷиноятӣ боз шуда, барои муҳокима ба Додгоҳи вилояти Хатлон фиристоданд.

Ду манба аз мақомоти тафтишотӣ, гуфта буданд, ки “парвандаи рӯҳонӣ се моҳ боз тафтиш мешавад. Худаш дар Боздоштгоҳи муваққатӣ аст”.

Тафсилоти бештар дар хусуси иттиҳом ва раванди тафтишот ва назари наздикони рӯҳонӣ оид ба иттиҳом маълум набуд ва ҳамчунин маълум нест, ки чӣ гуна дар як муддати кутоҳ парвандаи ӯ баррасӣ ва худаш ҳукм гирифт.

Ёдовар мешавем, ки моҳи январи имсол дар шабакаҳои иҷтимоӣ наворе аз ҷараёни тӯй нашр шуд ва дар он дида мешуд, ки як марде бо қиёфаи рӯҳонӣ монеи рақсу сурудхонӣ гардида, меҳмононро меронад.

Навори дашном ба меҳмонон ва рондани мардум аз хона барои рақсу бозӣ хашми корбаронро барангехт. Бисёриҳо рафтори ӯро танқид карда, хостори таҳқиқи он аз ҷониби мақомоти зиддахл шуданд.

Вазорати корҳои дохилӣ наворро шарҳ дода, рӯзи 27-уми январ гуфт, рӯҳонӣ Абдулҳаннон Маннонов ҷашни арӯсии ҷиянашро дар ҷамоати Меҳнатободи ноҳияи Кушониён баҳам задааст.

Худи Маннонов дар навори мақомоти корҳои дохила гуфт, ки аз асабоният чунин рафтор кард ва умед дорад, мардум ӯро мебахшанд.

Дар Telegram, Facebook, Instagram, OK ва ВК бо мо бимонед.