Вазорати корҳои дохилии  Русия  дар телеграм-канали худ тартиби сабти номи шаҳрвандони хориҷӣ ва шахсони бешаҳрвандиро шарҳ дод.

Ба иттилои ин ниҳод, шаҳрвандони хориҷӣ, аз ҷумла муҳоҷирони меҳнатӣ метавонан тавассути ду роҳ худро сабти ном кунанд: дар ҷойи зист ва макони будубош (маҳалли ҳузур).

‑ шаҳрвандони хориҷӣ, ки иҷозаи иқомати муваққат доранд, аз ҷумла бо мақсади таҳсил омадаанд ё иҷозаи иқомат дар Русияро доранд, метавонанд дар ҷои истиқомат сабти ном шаванд;

‑ шаҳрвандони хориҷӣ, ки иҷозаи иқомати муваққат надоранд метавонанд дар маҳалли будубоши худ сабти ном шаванд.

Бояд гуфт, шаҳрванди хориҷӣ барои сабти ном дар маҳалли будубош бояд ба ҷониби қабулкунанда ҳуҷҷати шахсият ва корти муҳоҷиратро пешниҳод намояд.

Одатан, ҷониби қабулкунанда шаҳрвандони Русия мебошанд, ки барои шаҳрвандони хориҷӣ манзили зист пешниҳод мекунанд. Ҳамчунин, он метавонад шахсони ҳуқуқӣ бошад, ки шаҳрванди хориҷиро барои кор даъват кардааст.

ВКД-и Русия таъкид кардааст, ки сабти номи шаҳрванди хориҷӣ дар ҷои истиқомат масъулияти ҷониби қабулкунанда мебошад, ки барои риоя накардани он ба ҷавобгарии маъмурӣ кашида мешавад.

Қаблан Владимир Колоколтоев, вазири умури дохилии Русия гуфта буд, ки “ҳангоми додани ҳуҷҷати тасдиқкунандаи иқомати муваққат ва будубош дар робита ба тағйири маълумот ва мавҷудияти мамнӯъияти вуруд ба Русия назорат бояд пурзӯр карда шавад”.

Бояд гуфт, ки дар ин шабу рӯз, пас аз ҳодисаи террористӣ дар “Крокус Сити Ҳол” ва боздошти шаҳрвандони Тоҷикистон бо гумони содир кардани он, муҳоҷирони кории тоҷик зиёд шикоят мекунанд, ки сабти ном дар мақомоти Русия душвор шудааст ва ниҳодҳои ин кишвар бо ҳар гуна баҳона, онҳоро боздошту ихроҷ мекунанд. Дар баъзе минтақаҳои ин кишвар бидуни сабаб аз сабти номи онҳо худдорӣ менамоянд.

Дар Telegram, Facebook ва Instagram бо мо бимонед.