Додситонии вилояти Суғд нисбати як сокини шаҳри Бӯстон ва як ноболиғ аз шаҳри Хуҷанд барои тавассути шабакаҳои иҷтимоӣ паҳн кардани хабарҳои беасос оид ба ҳодисаҳои куштору ғоратгарӣ дар шаҳри Конибодом ва гӯё мушоҳидаи ҷинояткорон дар шаҳрҳои Хуҷанду Бӯстон парванда боз намудааст.
Фурқат Хоҷазода, додситони вилояти Суғд зимни нишасти матбуотӣ гуфт, онҳо моҳи июн, вақте, ҷомеаро хабарҳо оид ба кушторҳои пурасрор дар шаҳри Конибодом ба таҳлука андохта буд, тавассути шабакаҳои иҷтимоии Фейсбук ва Инстаграм хабарҳои беасос оид ба пайдо шудани ҷинояткорон дар шаҳрҳои Хуҷанду Бӯстонро паҳн кардаанд.
Бояд гуфт, тибқи иттилои баъзе аз сокинони шаҳри Конибодом, аз оғози баҳор дар ин шаҳр 15 узви 5 оила ба таври пурасрор кушта шуда, ҷинояткорон боздошт нашудаанд. Дар чунин ҳолат ва бинобар адами маълумоти расмӣ ҷомеа дар ҳолати ҳарос қарор гирифта буд. Бо гузашти чанд моҳ, ВКД ҷузъиёти ин ҳодисаҳоро шарҳ дода, гуфт, ки “ягон ҳангомаи зиёдатӣ нест, кушторҳои муқаррарӣ аст”.
Ҳамин тавр, ба иттилои Фурқат Хоҷазода, яке аз нафароне, ки ба паҳн кардани хабари беасос муттаҳам аст, Н.К. як сокини 35 –солаи шаҳри Бӯстон будааст. Ӯ бо мақсади ҷалби таваҷҷуҳ ва зиёд кардани обуначиёни худ, хабарҳои беасосро паҳн кардааст. Нисбати ӯ бо моддаи 374, иловаи 1-и Кодекси ҳуқуқвайронкунии маъмурии Ҷумҳурии Тоҷикистон парванда боз шудааст.
![](https://asiaplustj.info/sites/default/files/articles/339521/%D1%84%D1%83%D1%80%D2%9B%D0%B0%D1%82%202.jpg)
Маълум нест, ки парванда нисбати Н.К. дар кадом марҳила қарор дорад ва оё ба додгоҳ ирсол шудааст ё не.
Ин банди Кодекси ҳуқуқвайронкунии маъмурии Ҷумҳурии Тоҷикистон ҷарима ба андозаи аз даҳ то бист нишондиҳанда барои ҳисобҳо (соли ҷорӣ як нишондиҳанда 72 сомонӣ аст) ё ҳабси маъмурӣ ба муҳлати аз даҳ то понздаҳ шабонарӯзро пешбинӣ мекунад.
Нафари дуюм бошад, ноболиғ М.М. буда, ӯ аз шаҳри Хуҷанд аст. Ӯ низ барои паҳн кардани хабари беасос тавассути шабакаҳои иҷтимоӣ муттаҳам мешавад. Ба қавли додситони вилояти Суғд, бо назардошти ноболиғ будани ӯ, нисбати волидонаш бо моддаи 90-и Кодекси ҳуқуқвайронкунии маъмурии Ҷумҳурии Тоҷикистон барои “Иҷро накардани уҳдадорӣ оид ба таълиму тарбияи кӯдак” парванда боз шудааст.
Боз ҳам маълум нест, ки парванда нисбати волидони М.М. дар кадом марҳила қарор дорад ва оё ба додгоҳ ирсол шудааст ё не.
Ин банди Кодекси ҳуқуқвайронкунии маъмурии Ҷумҳурии Тоҷикистон ҷарима ба андозаи аз понздаҳ то бист нишондиҳанда барои ҳисобҳоро пешбинӣ мекунад.
Ёдовар мешавем, ки ин аввалин ҳолати муҷозоти сокинон “барои паҳн кардани хабарҳои беасос” дар кишвар нест. Моҳи апрели соли ҷорӣ низ Раёсати Вазорати корҳои дохилӣ дар шаҳри Душанбе ду сокини пойтахтро барои паҳн кардани хабари беасос оид ба “рабудани кӯдак ва гирифтани узвҳои ӯ” муҷозот карда буд.
Аз сафар ба Русия муваққатан худдорӣ кунед! Тавсияи Сафорати Тоҷикистон дар Русия ба шаҳрвандони Тоҷикистон
“Қонуни тиб”-и Сино барандаи Шоҳҷоиза шуд
Гигабайтҳои гарон. Оё тоҷикон метавонанд ба интернети арзон умед банданд?
Шиносномаи дохилиро гум кардед? Чӣ тавр метавон шиносномаи нав гирифт?
Тотористон барои таҳсили тоҷикистониён дар коллеҷҳо 100 квота ҷудо кард
Ҳамлаи бесарнишинҳо кори фурудгоҳҳои Маскавро ба таъхир андохт
Мушакборони ғарби Сурия ва куштори 16 нафар. Сурия Исроилро гунаҳкор кард
“Вазифа”-и нави Шоҳрух Саидзода чист ва чӣ салоҳият дорад?
Мулоқоти навбатии ҳайатҳои Тоҷикистону Қирғизистон барои муайян кардани хатти марз
Боздошт ва ҳабси чор ҷавон барои муноқиша дар маркази Душанбе
Кулли ахбор
Авторизуйтесь, пожалуйста